Mizoram-ah Helicopter pahnih service tir tum a ni; Trolley enkawl dan tur thupek khauh tak siam

Mizoram-a Helicopter pahnih service turin Mizoram sawrkarin ruahmanna a siam fel tawh a, Union Home Ministry pawmpuina nghah mek a ni. Hetihlai hian Mizoram sawrkara Aviation Wing chuan Lengpui Airport-a Trolley hman dan tur chungchangah thupek tichhuakin, passenger-te bungraw nawr nan leh Cargo nawr nan tih lohah thil dang engah mah hman phal a ni lo.

Principal Consultant, GAD (Aviation Wing), Wg Cdr J. Lalhmingliana sawi danin Mizoram-a Helicopter pahnih service-na turin Union Home Ministry-in phalna a rawn pe tawh a, hire-na man subsidy 75% an rawn phalsak tawh a. Mizoram sawrkar tum ve tur 25% pawh Finance Department-ah thlenin an pawmsak tawh bawk a; amaherawhchu Union Home Ministry pawmpuina a la ngai a, chu chu nghah mek a ni.

Wing Cdr J. Lalhmingliana chuan tunlaia sawi hlawh tak, Lengpui Airport-a passenger trolley chungchangah February 14, 2023 khan Office Order tichhuakin, Trolley-te chu passenger-ten an bungraw nawr nan leh Airline leh Post Office Staff-ten Cargo an nawr nan tih lohah, thil dang engah mah hman phal a ni lo a. Order-a tarlan a nih danin Trolley-te chu Airport pawnah hman chhuah phal a ni lo a, Trolley in-charge ten tlai tin an chhiar vek hnuah, Arrival Hall-ah an dahlut vek ang, hmun khatah dahin chain hmangin an kalh ziah tur a ni a. Chahbi pawh an kawl nghal ang a, a tuk lehah Arrival Passenger-te lo thlen dawnah an hawng leh thin ang.

Kartin Zirtawpni apiangin Trolley dinhmun, a chhia a awm em, hmang dik lo an awm em tih te leh a zat chhiarin, ziakin report pek thin tur a ni a, a hmanna tur ni lo leh Airport hung pawn lama hmang an awm chuan a tul dan anga chawitir thin tur a ni. Hengte bakah hian February 20, 2023 ralhmain Trolley in-charge-ten Airport Staff Quarters, CRPF Camp leh Airport bul hnaiah trolley lakchhuah a awm leh awm loh an enfiah anga, chumi ni-ah vek chuan CSO hnenah report an pe ang. Daily Trolley Register hawn nghala register-ah chuan ni tin Trolley awm zat in-charge-ten ziaklutin an sign thin dawn bawk a ni.