State Resource Centre for HIV/AIDS lung phum

State Resource Centre for HIV/AIDS building thar sakna tur lungphum chu nimin khan Health Minister Dr. R. Lalthangliana chuan Aizawl-a MINECO-ah a phum.

He lungphum phumna hunah hian Health Minister chuan ‘State Resource Centre for HIV/AIDS’ tiin a hming vuah mah se a nihna dik takah chuan MSACS Office building tur a ni tih sawiin, hun rei tak Office nghet nei lova an insawnkual sek hnua hetianga hmun nghet MSACS in an nei ta chu a lawmawm takmeuh tih a sawi a. Sawrkar Office hmun tur bik MNF sawrkar hmasa khan neih a tul a ni tih ngaihtuahin tuna MINECO hmun atang hian harsa takin Assam Riffles-te sawnchhuakin sawrkar Office hmun tur hi a ruahman ta tih a sawi a, engtik ni-ah emaw chuan Health Department hnuaia thawktu hrang hrangte pawh helai hmunah hian an la awmkhawm theih a beisei tih a sawi bawk.

State Resource Centre for HIV/AIDS building hi Project Estimate chu cheng vbc. 4 niin Contract aggrement amount chu cheng nuai 392.23 a ni a, a zau zawng (plinth area) hi 280.35 Sqm. a ni a, chhawng 4 a sak tura ruahman niin AMC atanga sak phalna hmuh anih hnuah January 24, 2023 atang khan sak hna tan a ni. State Resource Centre for HIV/AIDS hi Ministry of Development of North Eastern Region (DoNER) hnuaia North East Special Infrastructure Development Scheme (NESIDS) Fund hmanga sak a ni.