Govt. Serchhip College Administrative Building sak tur lungphum Chief Minister in a phum
Govt. Serchhip College Administrative Building sakna tur lungphum phumna puala inkhawm Govt. Serchhip College Academic Building tual-a neih ah Chief Minister chuan Govt. Serchhip College Administrative Building sa tur hian a tirah cheng vbc. 10 vel estimate siamin hei hi a tam deuh avangin College a thawktute chuan Engineer te nen vbc. 6.5 vel estimate siam lehin SASCI atangin sum hi ruahman a nih thu a sawi a. Hemi atana hma latu zawng zawng te thawhrah chu a intan dawn ta tih a sawi a ni. Chief Minister chuan tun Ministry an hman tan dawn khan Planning Commission in kalphung te lo ti danglam tawhin nasa taka hmalak an tum thu leh an sawrkar kum khatna, kum 2019-ah pawh nasa taka hma an lak nghal thu sawiin, amaherawh chu kum 2020-ah Covid hri lo lengin Chaw ei-a dam khawchhuah chu kan tum a nih tak ber thu leh kum 17 chhung Finance Minister a nih tawh hnua a hrehawm ber term a nih thu a sawi a. Tunah chuan hri ten ziaawm lam panin kum 2019-a hmalakna te pawh an chhunzawm leh mek thu a sawi bawk.
Serchhip-a a rawn kal hmasak tuma PWD Staff Quarters sakna tur hmun a lo en tawh chungchang pawh Chief Minister chuan sawiin, SASCI thar lo awm leh turah nuai 300 chuang sengin quarters te sak a nih dawn thu leh hemi atana hma la nghal tura a tih thu a sawi bawk a. PWD chhuahsan tur hmun, Serchhip Venglai a mi chu Vantlang tana hman theih tura dah a nih dawn thu a sawi bawk.
He hunah hian Tuikum bialtu MLA leh Social Welfare and Tribal Affairs Minister Er. Lalrinawma pawhin Govt. Serchhip College in Administrative Block tha tak a nei tur chu a lawmpui thu sawiin, zirna ngai pawimawh em em Chief Minister kan nei hi kan vannei hle tih a sawi a. Mizoram-a zirna siamthat a nih theih nan Zirtirtu tam tak lak belh a nih bakah SEDP atang pawhin Zirtirtu tam tam lak belh an nih tawh thu a sawi a. A bial (Tuikum bial)-ah pawh sawrkar enkawl Primary School leh Middle School-ah MR-a thawk tur Zirtirtu te lak belh an nih hnuah zirlai 273 laia an pun thu a sawi bawk.
Er. Lalrinawma chuan nungchang siamna hmun pawimawh tak chu zirna In a ni tih pawh sawiin, nu leh pa ten kan fa te hmun hla zawkah kan dah vek theih loh avangin kan kawtkai atanga kan pan theih te thuamthat zel a nih thu a sawi a, Govt. Serchhip College pawhin Academic Building tha tak a neih hnua Administrative Block tha tak a nei leh tur chuan dinhmun tha zawkah a hlankai a beisei thu a sawi bawk.
Govt. Serchhip College Administrative (Block) hi Special Assistance to States for Capital Investment (SASCI) atanga sum hmuh hmanga sak tur niin Sanction amount chu cheng nuai 650 niin Agreement amount chu cheng nuai 568.36 a ni a, Feb. 27, 2023 atanga sak tan tur niin Feb. 27, 2025-a sak zawh tura ruahman a ni. A building hi Mizopa chhiara chhawng 4 tura ruahman niin Basement-ah Staff Room bakah NCC (Army leh Air Wing), IQAC Office, IGNOU leh RUSA bakah NSS Office te a awm anga. Ground Floor-ah Principal Room, Establishment Room, Account Room, SU Office, Women Cell leh Adventure Club te bakah Staff Room thenkhat a awm leh anga. First Floor leh Second Floor-ah Staff Room leh Store te a awm dawn bawk a ni.
Comments
Post a Comment