SEDP kalpui mek sawifiah

Chief Minister Zoramthanga'n Sawrkar Flagship Programme, SEDP kalpui mekah tum khata cheng nuai 3 sem nghal mai a rem loh avangin kum khatah chhungkaw pakhat tan Rs. 50,000 a kalpui phawt a ni tih a sawi.

Nimin-a Assembly Budget Session-ah Thorang bialtu MLA Zodintluanga zawhna leh zawhbelhna dangte a chhannaah Chief Minister hian, chhungkaw lam hawia SEDP kalpui mekah Rs. 50,000/- an sem chu thawh hnih-a sum pek niin, thawh khatnaah Rs. 25,00/- pek phawt an ni a, a thawh hnihnaah Rs. 25,000/- dang pek tura tih a ni a, sum sem tur hi ruahman fel vek tawh niin sem theih tep a ni tawh tih a sawi.

Chief Minister chuan, State Sawrkar Flagship Programme, SEDP chu Sawrkar-in a ngai pawimawh hle tih sawiin, kum 2019-20 khan SEDP hi engemaw chen chhungkaw lam hawia kalpui a lo ni tawh a, COVID-19 hri leng vanga an chhunzawm theih loh hnuah hri leng a ziaawm tak avangin sawrkar kum kal mek atangin sem tan a ni ta a, chhungkaw pakhat hnenah Rs. 50,000 kum khat atan pek phawt a ni a, tum khata cheng nuai 3 chu tih theih a ni lo a, chhunzawm zel tur a ni tih a sawi bawk.

SEDP chu a hming angin mipui leh ram sum leh pai dinhmun tihhmasawnna tura flagship programme atana Fund pui dahkhawmna a nih thu Chief Minister chuan sawiin, SEDP ah hian Health Care pawh telh vek niin, sawrkar kum tharah SEDP atangin Health Care-ah cheng vbc. 50 dah a ni a, kum dang a lo dah tawh nen SEDP atanga Health Care atana sum an dah chu a vaiin cheng vbc. 150 a tling tawh tih a sawi a. Health Care Bill ba awmte chu a theih ang anga rulh a nih thu leh Health Care atan ADB atangin cheng vbc. 1,000 hmuh beisei a nih thu a sawi bawk.