ZMC-ah Phir inzawm zai hran an ni

Mizoram-a a vawikhatna atan nimin khan Zoram Medical College-ah Phir, an taksa inzawm (conjoined twins) chu hlawhtling taka zai hran an ni.

Heng naupang te hi Dr. John Lalliandinga, Associate Professor of Surgery ZMC hovin Plastic Surgeon, General Surgeon leh Anesthesiologist ten darkar 3 chhung an zai a. Nausen pianghlim zaite hi Lawngtlai District-ah February ni 9, 2023 khan an piang a, an Awm leh Dul a inzawm bakah an Thin (liver) a inzawm bawk a. Thin (liver) pakhat intawm an nih avangin nausen pahnih hi Thin pakhatin a chawm zawh dawn loh avangin naute pakhat zawk chhan nan Thin hi zai phel a ngai a, tun dinhmunah chuan an pahnih hian ZMC NICU-ah enkawl mek an ni. 

Conjoined twins hi nausen pianghlim an taksa inzawm emaw, taksa peng leh kawchhung inzawm tlat tihna niin khawvelah hetiang hi a vang em em a, naupiang nuai khatah pakhat a awm thin anga ngaih niin damkhawchhuah loh hlauhawm tak dinhmuna ding an ni.