Chief Minister thubuai neih leh neih loh thu ah Assembly House-ah inhnialna a thleng

Nimin-a Mizoram Legislative Assembly thutkhawm ah Dampa bialtu MLA Lalrintluanga Sailo leh Serchhip bialtu MLA Lalduhoma te chu Chief Minister Zoramthanga thubuai neih leh neih loh ah inhnialin, Home Minister Lalchamliana chuan, Home Department ngaihdan ah chuan Chief Minister hian thubuai a nei lo niin a sawi.

Nimin-a Assembly thutkhawm ah Dampa bialtu MLA Lalrintluanga Sailo chuan Zirtawpni-a Private Member Resolution sawihona ah Serchhip bialtu MLA zahawm takin Chief Minister Zoramthanga chu thubuai nei niin a sawi thu leh a ngaih thutak thu tarlangin, “A sawi dik lo a nih chuan House-ah ngaihdam a dil ka phut a ni,” tiin thubuai a lo nei a nih chuan ngaihdam dil mai loin a bang ngam ang tih a sawi a. Lalduhoma chuan Mizoram First Movement ten April 11, 2022-ah Lok Ayukta-ah CM lakah case an file tih a sawiin, Lok Ayukta hi Autonomous body a nih thu te, Home Department hnuaia awm a nih loh thute sawiin, “Mi'n chutah chuan complaint an thehlut a, investifation a kal mek a, chubaka thubuai nei awm chuang,”a ti bawk.

He inhnialna chungchang hi Dampa bialtu MLA ngenna leh Deputy Speaker in sawifiah tura a tih angin Home Minister Lalchamliana chuan a Department enkawl te tana sum ruahman khaikhawmna hunah sawilangin, Assembly House-a CM in thubuai a neih chungchang sawichhuah a nihin Police lam a zawtfiah tih a sawi a, Lengpui Airport sak chungchangah MPYCC leh Mizo-ram First Movement ten complaint/FIR an thehluh thu leh FIR chu Police ngaihdan chuan Case a la tlin loh thu te a sawi a. “Kan hriatzui danin Lokayukta in ACB-ah Preliminary Enquiry (PE) ti turin thupek a chhuah a, chuvang chuan Police ngaihdan chuan case a la tling lo a, PE in ‘case nei tlak a ni e’ a ti mai thei a, ‘ngaihtuah zui tlaka ni lo e’ a ti thei a, Chuvangin Home Department ngaihdan chuan kan CM in case a nei lo,” a ti a. “Lokayukta lam chu ka hrelo a, mi'n Corruption case emaw, Ciminal case emaw a neih chuan Police in an register tur ni awm tak a ni a, Police lamin chutiang register a awm lo tih an sawi,” a ti bawk.