Kangmei a lo chhuah palh thuta kan tihtur leh tih loh tur naupang chena kan hriat a tul - DC Serchhip
Serchhip District Disaster Management Authority (DDMA) buatsaiha Zirtawpni kalta a kangmei laka himna chungchang inzirtirna hun, ‘Sensitization on Fire Safety’ Serchhip DC Conference Hall a neih ah he thu hi sawiin Bawrhsap leh Serchhip District Disaster Management Authority Chairman Nazuk Kumar chuan, kangmei chhuak thin vang hian In lamah leh kan ramngaw ah te kan rohlu kan chan nasa em em thin a, hei vang hian kangmei laka invenna lam kan inzirtir uar a tul a, kangmei a lo chhuah palh thuta kan tihtur leh tih loh turte pawh chiang taka mitinin naupang chena kan hriat hi a tul hle bawk, a ti a. “Vawiina kalkhawmte hian kan thil zirte mi tam zawkte zirtira hrilh zelin, mitinin himna dante kan hriata kan zawm theuh a tul takzet a. Thal khawro hun kan thleng chho leh tan tak avangin mipuite zirtirna lam leh mahni hmazawna hma kan lak theihna ah Department tinte pawhin tan lo la turin ka sawm che u a ni,” a ti bawk.
He hunah hian Serchhip District-a DM&R Incharge Officer F. Lalnisai SDC pawhin Serchhip District-a DDMA hmalak dan tlangpui leh District chhunga chhiatna thlen tam dan te a tarlang a, kangmei chhuak thin chu mihring tihchhuah kangmei zel a nih thu a tarlang bawk. Hei bakah hian eng chhiatna pawh lo thleng se rang taka hmachhawn anih theih nan Zonal Officer te hrilhhriat thuai zel a tul thu te, anni hriatpuina lova hma lo lak mai hian sum leh pai sanction zui thuah harsatna a thlen thu te, Zonal Officer te hriatpui ngeia hmalakin SDRF atanga tanpuina inpek a awlsam thin thu te sawiin, Zonal Officer te kaltlang ngeia hma la thin turin mitinte a ngen a. Kum 2021 khan Serchhip District hmun 11-ah kangmei liantham a chhuak a, kum 2022-ah erawh kangmei chhuak liantham a awmlo tih tarlan a ni bawk.
He hunah hian Serchhip DDMA member te, Head of Offices te, District Level NGOs aiawhte, Serchhip khawpui chhunga Branch YMA leh Village Council tin aiawhte telin Dr. Lalrokima Chenkual, Deputy Director, DM&R chuan ram kangin harsatna min thlen theih dan leh invenna tura hmalak dan tur a zirtir a, Serchhip Fire Station-a Station Master Ruatliana chuan kangmei chhuah thin chhan leh a inven dan te a zirtir bawk a ni.
Comments
Post a Comment