LSA leh CYLA ten DC&MA Minister chu a thusawi ah ngaihdam dil turin an phut

Lai Students’ Association (LSA) General Headquarters Lawngtlai chuan District Council & Minority Affairs Department changtu Minister R. Lalzirliana chu Assembly House-a a thu sawi chungchangah ngaihdam dil tur an phut thu an sawi.

Hemi chungchanga nimin-a thuchhuah an siamah LSA chuan, Assembly Budget Session neih mekah February 23 khan District Council & Minority Affairs Department enkawltu Minister R. Lalzirliana chuan 125th Indian Constitutional Amendment (Sixth Schedule) chungchangah Parliamentary Standing Committee-in Mizoram sawrkar a rawn angin Mizoram sawrkar ngaihdan chungchangah engkim hre vek leh, “Congress hunlai khan saw lamah khan vote zawn nan lem kan va der ve mai mai a nih kha, an lo awi ve em em leh nghal a, a ho tak tak ania,” tia a sawi chu pawi an ti takzet tih an sawi a. Hei bakah hian Guwahati-a Meeting-ah pawh a tel ve anga a insawi chungchangah LSA te pawh Meeting-ah an tel ve thu leh Minister hi a tel ve awm an hriatloh thu an tarlang a. ADC mipuite zah lo tak leh hmusit taka Assembly House-a a thusawi chungchangah ngaihdam dilna emaw, thupha chawina emaw Assembly House-ah nei/siam tura an phut thu sawiin, an duhna te hi a tih hlawhtlin sak thei lo a nih chuan eng thil ah pawh R. Lalzirliana chu Lawngtlai District leilung rap tawh lo turin an ngen nghal bawk.

Nimin vek khan Central Young Lai Association pawhin thuchhuah siamin District Council & Minority Affairs Department changtu Minister R. Lalzirliana thu sawi hi Hnam bil inhmuhsitna tawngkam, ADC Area-a cheng mipuite thamlohna lian takah an ngai tih an sawi a. Hei vang hian DC&MA Minister chu he thu a sawina Assembly House-ah ngei ADC Area a cheng mipuite hnena ngaihdam dil tura an phut thu leh DC&MA Department enkawl tur hian amah (R. Lalzirliana) ni lo, midang ruat turin Chief Minister chu an ngen bawk tih an tarlang.

He thusawi chungchangah hian Siaha-a NGO leh Political Party hrang hrang te chuan naktuk chawhnu dar 1:00 hian Siaha-ah lungawilohna lantirna hun hman aan tum bawk a ni.