House-a Private Member Bill putluh Select Committee ngaihtuah tura dah a ni

Nimin-a Mizoram Legislative Assembly thutkhawm ah Aizawl North-II bialtu MLA, Dr. Vanlalthlana'n Private Member Bill a putluh, The Mizoram Land Revenue (Amendment) Bill, 2023 chu sawiho a nih hnuah Select Committee ngaihtuah tura dah a ni.

Nimin Zirtawpni kha Assembly thutkhawm neih mekah Private Member Bill sawihona hun niin Aizawl North-II bialtu MLA Dr. Vanlalthlana hian Private Member Bill, ‘The Mizoram Land Revenue (Amendment) Bill, 2023’ chu a pulut a, Bill puluttu Dr. Vanlalthlana chuan a Bbill-in a tum ber chu huan, lo ram neih tam leh neih zau dan anga chhiah lak tih danglam a ni tih a sawi a. Mihring lo pung zelah mi hausa leh rethei inkar a zau belh zel avangin mi hausa, anmahni enkawl theih loh thleng ram lei an awm thin a, dan thar a awm loh chuan mi hnuaihnung zawk ten ram an nei ve thei dawn lo tih sawiin, a bill putluh chu pass-pui ngei turin House a ngen a.

Bill sawihonaah Opposition Group Leader, ZPM MLA Lalduhoma chuan hmun hrang hranga ram tha chu mi hausa ten an nei deuh vek tawh tih sawiin, hei hi dan a nih theih nan bill chu pass ngei an duh tih a sawi a. Congress Legislature Party Leader Zodintluanga pawhin Bill chu an party chuan tha an tih thu a sawi ve bawk a. House Leader, Chief Minister Zoramthanga chuan ram sem rual dan tha ngaihtuah a ngai tih sawiin, ram atanga chhiah lak dan tha neih a ngai bawk tih a sawi a, Bill putluh chu Select Committee-ah thlen ni se a duh thu a sawi a ni.

Hemi hnu hian Speaker Lalrinliana Sailo chuan Member te chu Bill pass an duh leh duh loh a zawt a, Member ten Bill chu Select Committee-ah thlen ni se an duh angin Select Committee kutah dah a ni ta a. Select Committee-ah hian Minister Lalruatkima rawt angin Chairman-ah Dr L. Thangmawia ruat a ni a. Member atan Lalruatkima, Dr. Vanlalthlana, Lalrindika Ralte, Dr. BD. Chakma, Dr. K. Pachhunga leh K.Laldawngliana te House-in lungrual takin a pawm a ni.