Private Member’s Resolution pahnih pawm a ni

Zirtawpni kalta-a Assembly thutkhawm ah Private Member‘s Resolution pahnih sawihoin lungrual taka pawm a ni.

Zirtawpni a Assembly thutkhawm ah Aizawl South II bialtu MLA Lalchhuanthanga putluh, “Kawngpui tha leh building tha kan neih theih nan tun aia ulukin hna thawh ni rawh se” tih chu PWD changtu Chief Minister tiamin Member 7-te’n an ngaihdan an sawi hnuah pawm remti lo awm lovin House-in lungrual takin a pawm a. Hachhek Bialtu MLA Lalrindika Ralte putluh, “Kan ram thenawmte atanga sahimna zawnga rawn raltlante hi kan sawrkar hian an awmna tur siamsakin duat takin enkawl se, awmkhawmna tur hmun bik ngaihtuahsak rawh se.” tih pawh sawiho a nih hnuah House Leader, Home Minister leh Member dangte rawt angin, “Kan ram thenawm Myanmar leh Bangladesh atanga sahimna zawnga kan unau raltlana lo kal te Mizoram sawrkar leh Mizoram mipuiten tha taka kan lo dawngsawng hi a lawmawm kan ti a. A tul ang zela lo tuamhlawm chhunzawmin an awmna tur leh an mamawhte ngaihtuah zel ni se kan ti,” tiin lungrual takin pawm a ni bawk.

Heng Private member’s Resolution pawm a nih hnu hian Speaker Lalrinliana Sailo chuan a hriat theih chinah Opposition Member Resolution pahnih ni khata pawm awmchhun nia a hriat thu sawiin, ram tana thu khat vuaa an thawhhona chu lawmawm a tih thu a sawi bawk.

Comments

Popular News (Last 30 Days)

Serchhip DCSO sawn a ni