MJA Serchhip District Annual Conference nei

Mizoram Journalist Association (MJA) Serchhip District Annual Conference vawi 23-na chu Zirtawpni khan Serchhip Press Club-ah neih niin I&PR Deputy Director leh Serchhip DIPRO K. Saitluanga chuan khuallian niin a hmanpui a ni.
MJA (SD) Annual Conference ah hian I&PR Deputy Director chuan MJA chu kan ram a pawl zahawm ber pawl nia a hriat thu sawiin, mipuite kaihruai thintu, kawng dik leh thudik kawhhmuh thintu an nih avangin a chhunga member te inngaih aia nasain mipuiten an zah nia a hriat thu a sawi a, Pawl hmingtha tak ni zel turin duhsakna a hlan bawk. Serchhip DIPRO chuan Serchhip District tih hian Serchhip khaw chhung chauh ngaihtuah mai a awl fo nia sawiin, District capital mamawh leh harsatna chauh thlur lova District chhung khaw dangte hre tel zel turin a chah a, mipuite rawngbawltu an nihna hriaa, mahni hamthatna chauh um ngawr ngawr lova, District mipuite mamawh dah uar turin a ngen a. “Memberte rilru put hmang dik sela, thil tha tih duhna in inthlung nghet ila, pawl a zahawm zual zel dawn a ni,” a ti bawk.

MJA (SD) Annual Conference hi an pawl Vice President C. Ramengmawia chuan kaihruaiin an President C. Lalhminghlua chuan thu a sawi bakah General Secretary Zonunsanga Kawlni leh Treasurer Lalremruata Ralte te hnen atangin report ngaihthlak a ni bawk.

MJA Serchhip District-ah hian member mi 14 awmin an zinga 11 te hi Serchhip leh midang 3 te hi Thenzawl an ni a, Conference-ah hian member te tel kim theiin chawhnu lamah rorelna hun an hmang bawk. MJA (SD) Member zinga mi 11 te hi Print Media a thawk niin 3 hi Electronic Media a thawk an ni bawk.