Aizawl khawpui kum 133 tlin lawmna neiin kumtin ‘Aizawl Day’ hmang tawh tura ruahman a ni

Mizoram khawpui Aizawl in kum 133 a tlin lawmna pui ber leh a kharna chu Inrinni khan Aizawl Municipal Corporation (AMC) buatsaihin Aizawl Sipai Lammual-ah ropui taka neih a ni a. ‘Aizawl Day’ hi kumtin February 25-ah lawm tura ruahmanna siam a ni bawk.

Aizawl Municipal Corporation (AMC) buatsaiha Aizawl Day vawi 133-na lawmna kharna hun Aizawl Sipai Lammual-a neih hi Aizawl Mayor Lalrinenga Sailo chuan khuallian nia hmanpuiin Feb. 25, 1890 atang khan Aizawl chu mei mit lova luah tan a nih thu leh he ni hi Aizawl khawpui din tan ni-ah chhiar a nih thu a sawi a. Kum 133 chhung hian Aizawl in hun hlimawm tak tak te leh hun khirkhan tak tak te a lo paltlang tawh thu sawiin, “Indopui I-na ah phei kha chuan France rama kal turin Sipai Lammual-ah Mizo tlangval 2100 zet an pungkhawm a, chutiang chuan mi ram te ang bawkin Aizawl hian History tam tak a nei a ni,” a ti. Aizawl Day lawm rel a nih dan te sawiin Aizawl Mayor chuan, “Mipuiten hna nasa takin kan thawk a, a te ber atanga a lian ber thlengin he ni pual hian hun hlimawm tak hman kan phu nia kan hriat avangin AMC chuan Aizawl Day hi ropui taka hman ni se, tiin a rel a ni,” a ti a. Kum lo la kal zel turah pawh Zofate Jerusalem Aizawl khawpuiah Aizawl Day hmannaa tel theuh turin ram chhung leh ram pawna awm Zofate a sawm nghal bawk.

Aizawl Day hi kumtin February 25 apianga lawm tura ruahman a ni a, kumin hian Programme hrang hrang buatsaih niin February thla laihawl vel atang khan AMC Ward hrang hrangte Football-a inelna buatsaih niin February ni 23 atang khan Lammual-ah Aizawl Fair neiin thil chi hrang hrang zawrh leh phochhuah a ni a. February ni 22-24 chhungin I&PR Auditorium-ah Film Festival buatsaih a nih bakah February ni 23 khan Aijal Club-ah Conclave buatsaih a ni a, Aizawl Day Souvenir lehkhabu tlangzarh a ni bawk.

Aizawl Day lawmna pual hian Inrinni zing khan Aizawl khawpui chhung hmun thum atangin‘Aizawl Day Run’ huaihawt a ni bawk a, Thupui-ah ‘Aizawl Day Run for Clean Aizawl’ tih hman niin Aizawl khawpui faina leh thiang-hlimna atan an tlangau a. He hunah hian mi sang chuang telin Aizawl Sipai Lammual-ah an intawkkhawm a ni.