e-connectivity tihchangtlun a pawimawh tih sawi

Mizoram tlawha rawn zin Union Minister of State for Communication Devusinh Chauhan Mizoram-in kawng hrang hrangah chak zawka hma a sawn theih nan e-connectivity tihchangtlun a pawimawh hle dawn a ni, a ti.

Inrinni chawhnu lama CS Conference Hall, Aizawl a Mizoram sawrkar mi pawimawh te nen thutkhawm an neih ah Union Minister Devusinh Chauhan chuan Prime Minister Narendra Modi-in India hmarchhak bial hmasawnna tur a ngaih pawimawh em avangin Union Minister te chu thla tin North East State engemaw ber tlawh tura a chah theuh angin Mizoram State rawn tlawh chu a duh tak thu a sawi a. Inkalpawhtawnna leh inbiakpawhtawnna te (communication & e-connectivity) a thatna apiangah hmasawnna hna chak zawkin a kal thei a, Mizoram anga tlangram leh kawngpui tha siam awlsam lohna hmun angah te hlei hlei e-connectivity a tangkai zual thei a ni, a ti.

Devusinh Chauhan chuan Central Scheme tam tak he State-ah pawh kalpui mek a ni a, hengte pawh hi e-connectivity tha neih hmasak loh chuan hnathawh that a har dawn a, thingtlang khua engmawzat chu e-connectivity-in a la thlen phak loh avangin engemaw chen chu Scheme kalpui tum mahse a thlen tur dik tak, a tangkaipui tur dik tak mipuiten an chhawr thei lo thin a ni, a ti a. Thingtlang lam khaw tam zawkah Bank leh Insurance lam an awm mang lova, hengte pawh hi e-connectivity chak loh vang a ni tih sawiin Union MoS chuan, Mizoram harsatnate hre reng chunga hmalak dan tur ruahmanna leh hmachhawp (proposal) te an rawn thehluh leh hunah pawh uluk lehzual turin ICT Officials te a chah a, sawrkar laipui lamah theihtawp a lo chhuahpui zel ang tih a sawi bawk.

He inkawmna ah hian Mizoram sawrkar-a ICT Minister Robert Romawia Royte pawhin Sawrkar Laipui-a Communication Minister zinga Mizoram rawn tlawhtu hmasa ber leh e-connectivity lamah Mizoram hmasawnna a tak taka duhtu Union Minister a nih avangin lawmthu a hrilh a. Mizoram chu tlangram a nih vanga harsatna hrang hrang awm theite sawiin, heng harsatna karah pawh Central Scheme te chu Mizoram Sawrkarin theihtawp chhuahin mipuiten an chhawr phak turin a kalpui mek zel a ni, a ti a. e-connectivity ti hmasawn tur chuan Service Provider hrang hrang – BSNL, Airtel, Jio leh a dangte inkarah thawhhona (coordination) tha zawk neih a ngai a, hemi kawngah pawh theihtawp chhuah a ngaih thu a hrilh a. SASCI hnuaia project hrang hrangte chu hunbi nei (time bound) a nih avangin State ICT Official-te pawhin a hun takah project-te zawhfel a nih theih nan nasa lehzuala hna thawk turin a fuih nghal bawk.