Union Minister of State for Communication in zan khat riakin Serchhip a tlawh mek

Union Minister of State for Communications Devusinh Chauhan chuan zan khat riakin Serchhip a rawn tlawh mek a, nimin chawhnu khan Serchhip-a Sawrkar Department hotute leh tlawmngai pawl hruaitute a kawm bakah Serchhip District Hospital leh Serchhip Post Office te a tlawh bawk.

Union Minister Devusinh Chauhan hian nimin chhun khan Helicopter hmanga Serchhip rawn thlengin Serchhip District Bawrhsap Nazuk Kumar leh SP Stephen Lalrinawma bakah Addl. DC Lalmuansanga Ralte leh sawrkar mi pawimawh ten an lo hmuak a, chawhnu dar 2:00 khan Serchhip DC Conference Hall-ah Serchhip-a sawrkar Department hrang hrang hotute kawm nghalin Prime Minister Narendra Modi-a'n India hmarchhak hmasawnna a ngai pawimawhin a vei em em a, a Minister te chu India hmarchhak State tlawh vek turin a tih thu sawiin, anni pawhin hei hi phur takin an bawhzui tih Union Minister chuan a sawi a ni. Minister Devusinh Chauhan chuan District chhunga sawrkar laipui in hmasawnna hnathawh a kalpui mekte a mit ngeia a hmuh thu leh heng hnathawhte hi tha taka tihhlawhtlin a nih chu an duhthusam a ni tih sawiin, an duhkhawp lohna laite leh tan lak ngai laite a awm a nih chuan a hnena thlen turin Official kalkhawmte a chah a, Postal Service (Dak) tihchak lehzual kawngah tanlak a nih tur thute, Internet Connectivity tihhmasawn lehzual tum a nih thute sawiin, India Post hnuaiah hamthatna chi hrang hrang miretheite hnen thleng thei a awm tih a sawi a, hengte hi ngaihvena chhawr tangkai turin mipuite a sawm bawk.

Serchhip District Addl. DC Lalmuansanga Ralte kaihhruai he hunah hian Serchhip District Bawrhsap Nazuk Kumar chuan Serchhip District dinhmun tlangpui leh sawrkarin hma-sawnna hna a thawhte a lem nen entirin a sawifiah a, Serchhip SP Stephen Lalrinawma pawhin Police in dan leh thupek kenkawh kawnga hna an thawh dan te a sawifiah bawk a ni.

DC Conference Hall-a inkhawm neih a nih hnu hian DC Meeting Hall-ah Union Minister hian MJA Serchhip District, Serchhip Sub-Hqrs. YMA, Serchhip Joint VC leh Kohhran hruaitute a kawm a, Union Minister in Serchhip a rawn tlawh chu lawmawm an tih thu leh inbiak-pawhna lama harsatna te an lo thlen a ni.

Hemi hnu hian Union Minister hian Ser-chhip District Hospital chu tlawhin Serchhip CMO Dr. Lalzawmi leh DMS Dr. ZD. Lalmuan-awma bakah thawktu dang ten an lo dawngsawng a, Serchhip Damdawi In-a Ward hrang hrang tlawhkualin Serchhip CMO Conference Hall ah thawktute nen inkawmna hun tawi an nei a, Staff Quarters chungchanga harsatna an neih te an lo thlen nghal bawk a ni.

Communications changtu Union Minister hian Serchhip Venglai-a Serchhip Post Office pawh nimin tlai khan a tlawh bawk a, an hnathawh leh an dinhmun te zawhfiahin thawktu te pawhin harsatna an neih te an lo thlen bawk a ni. Serchhip Post Office-ah hian Office-a thu a hnathawk mi 3 leh Dak semtu mi 5, an vaiin mi 8 an thawk mek a ni.

Minister of State Devusinh Chauhan hi a nupui Bhartiben Devusinh Chauhan leh a Personal Staff ten an rawn tawiawm a, a Ministry enkawl atangin Joseph Lalrinsailova, Post-Master General leh Rajashekar Reddy Algubell AGM (Rural), BSNL bakah Postal leh BSNL Official ten an tawiawm bawk a ni.

Ruahman lawk ang chuan tukin hian Serchhip-a Agriculture Complex chu Union Minister hian tlawhin Serchhip Kawlri tlang a tlawh bawk anga, hemi hnu hian Serchhip chhuah-sanin Helicopter hmangin Aizawl a pan leh dawn a ni.