Lenkawl

Govt. Serchhip College chuan nimin khan ‘Annual Day cum Graduation Day’ hmangin Serchhip District Bawrhsap Paul L. Khuma chuan hmanpuiin Graduate thar te hnenah Certificate a hlan a. Zirlaite chu tum leh hmathlir nei tura chahin, chumi ti hlawhtling thei tur chuan theihtawp chhuah turin a chah.

Samagra Shiksha Serchhip District buatsaihin niminpiah, August 28, 2025 khan Serchhip BRC Hall-ah ‘District Level Kala Utsav 2025-26’ chu neih a ni.

Serchhip District chhunga Special Juvenile Police Unit (SJPU) te leh Police Personnel te tan nimin khan Serchhip SP Conference Hall-ah Juvenile Justice (Care and Protection) Act, 2015 leh Protection of Children from Sexual Offences Act (POCSO Act) chungchang zirhona neih a ni.

Serchhip-a Tourist Service Provider te tan nimin khan Serchhip DC Pisapui Hall-ah Capacity Building Programme hman a ni.

Serchhip District Level Committee for Celebration of Teachers’ Day chu nimin khan Serchhip Bawrhsap Paul L. Khuma hovin Serchhip DC Meeting Hall-ah an thukhawm a, thla thar September 5-a Teachers’ Day 2025 lo thleng tur chu sawrkar Pisa chawlh a nih avangin September ni 4-ah School tin ten mahni School theuhah mahni remhriat dan angin lawm nise an ti a. Hei bakah hian Teachers’ Day denchhen hian Serchhip District chhungah Zirtirtu chawimawina, National leh State Award dawng tawh te chu anmahni khua ah emaw, Veng-ah emaw chawimawi an ni ang. Hei bakah hian he ni puala hmalakna tur hrang hrang te pawh rel nghal a ni bawk.

Dampa Bial-a Assembly by-election neih tur atan sawrkar lam a inbuatsaih chhoh mek laiin Political Party te pawh an inbuatsaih mek a, MNF Party chuan he inthlanna neih tur atan hian an President, Zoramthanga kaihhruaina hnuaiah Nomination Committee dinin Member mi 10 bakah Member Secretary mi pakhat an ruat a, karleh lamah thutkhawm an nei nghal dawn a ni. Tarlan tawh angin ZPM Party chuan he inthlanna neih tura an Candidate atan Vanlalsailova an ruat thu an puang tawh a, BJP in Search Committee din tawhin Candidate neih an tum a, Congress pawhin Candidate tur hi an ngaihtuah mek bawk a ni.

Chief Minister Lalduhoma chuan nimin khan Aizawl Chanmari-a Local Fund Audit & Pension Office chu tlawhin thawktute a kawm a, Pension first formulation hna chak taka an thawh avanga lawmthu hrilhin, “e-filing leh digitalization chak zawka kan kalpui theih chuan vawiin a kan hmunhma indaihlohna leh file upa tawh tak tak, a chhiat hlauhawm si te hi min chhawk zangkhai theiin kan ring. Pension buaipui hi a hautakin kan pensioner te tan pawh a buaithlak thin a, awlsam zawka kalpui thiam (simplify) a tul hle,” tiin an harsatna te chu a theih ang anga bawhzui a nih tur thu a hrilh bawk.

Nimin khan T. Romana College-a Department of Sociology Final Year zirlaite tan Rural Development hnuaia hmalakna hrang hrang inhrilh-hriatna hun chu RD Directorate Conference Hall-ah neih niin RD Minister Prof. Lalnilawma chuan a hmanpui a, Minister chuan zirlaite Subject zirlai piah lama khawtlang mipui tana sawrkar in a hma a lak mek te chiang zawka hre tura ruahmanna a awm chu lawmawm a tih thu sawiin, he hunah hian MGNREGS, MzSRLM, Social Audit Unit, BADP/SASCI/RMIS te, WDC-PMKST 2.0 leh PMAY-G/SAGY chungchang zirho a ni.

Mizoram Planning, Economic & Statistical Service Association chuan nimin khan Planning Conference Hall-ah Conference vawi 16-na hmangin he hun hi Chief Minister Lalduhoma chuan khual-lian niin a hmanpui a, Mizoram Planning, Economic & Statistical Service Association Member te chu Sawrkar Official data buatsaihtu leh Department hrang hrang atanga project lo lutte lo zir-chiang a lo thlifimtute an nih thu sawiin, “Kan sawrkar hnuah phei chuan Project proposal zawng zawng in hnenah a lut hmasa ta vek a. In thuneihna leh thiltihtheihna kan tipung a, in thutlukna hian kan ram future a chhun ruih mai a ni,” tiin an pawimawh zia a sawi a ni. Tunah hian MPE&SSA-ah hian member 44 an awm mek a ni.

Lengpui Airport tihchangtlun leh a himna lam aiin Indian Airforce ten ram an lakna tur lamah sawrkar in hma a la chak zawk niin Lengpui Airport Forum chuan nimin khan Aizawl Press Club-ah thuthar thehdarhtute kawmin an sawi a. Mizoram sawrkarin ni 100 chhunga a ngaih pawimawh tur zinga a telh, AAI kuta Lengpui Airport hlan tih chu hmalakna awmze awm a awm zui lo nia sawiin, RTI zawhna chhanna an dawn danin, Lengpui Airport chu Airport Authority of India (AAI) kuta hlan tura Union Home Minister Amit Shah in a sawi chungchangah GAD Civil Aviation chuan bawhzuina mumal a awm lo niin an sawi. Lengpui Airport Forum hotute chuan Lengpui Airport chu a him tawk tawhlo hle nia an hriat thu sawiin, tuna thlawhna tum mek ten runway chhah zawng PCN 50 tal an mamawh laiin PCN 36 chauh a nih thu leh Airport him leh himloh endik hnua phalna pek thin-Aerodrome Licence pawh kum 3 atanga kum 5 chhung atan pek thin an nih laiin Lengpui Airport chu thla 3 bak an renew duh lo niin an sawi.

India ram Hockey khel thiam lar, Major Dhyan Chand-a piancham denchhenin nimin, August 29, 2025 khan India ram pumah ‘National Sports Day’ hman a ni a, Mizoram-ah a lawmna pui ber chu Sports Authority of India (SAI) State Training Centre, Mission Vengthlang-ah neih a ni.

Higher & Technical Education Department hnathawh thlirletna hun chu nimin khan Minister Dr. Vanlalthlana hovin neih a ni.

Mizoram-a Iskut tharchhuah tlakhniam chhan zirchianna report chu nimin khan Agriculture & Farmers’ Welfare Minister PC. Vanlalruata chuan a Pisa-ah a tlangzarh.

 

HIV/AIDS dona kawnga hmalakna pakhat atan nimin khan Serchhip Pisapui Hall-ah Serchhip District Level Red Ribbon School Quiz Competition neih a ni a, Presbyterian English School (High School Section) Serchhip chu pakhatna an ni.

Pradhan Mantri Krishi Sanchayee Yojana (PMKSY) hnuaia North Vanlaiphai leh Lung-kawlh-a hmalakna te chu nimin khan Serchhip DRDO Project Director Dr. Malsawmtluanga Fanchun leh Serchhip DRDO Official ten an enfiah a. PMKSY hnuaiah hian North Vanlaiphai leh Lungkawlh khua ah hian Project kalpui mek niin Rainbow Rooster Ar note leh a chaw te pek an ni a. Lungkawlh-ah hian chhungkaw 20 hnenah Zikhlum chi sem niin tunah hian a rah an seng tan mek a. A hmunah hian kg khat Rs. 40 in an hralh a, chawhrualin chhungkaw tin hian cheng nuai 2 man vel theuh lei theih an inbeisei a ni. North Vanlaiphai-ah hian Project hnuaia Self-Help Group ten Food Processing lam an kalpui a, Anthur Candy, Khawmhma Sweet, Balhla tui etc. an siam chhuak mek bawk a ni.

Serchhip Town Land Committee chu nimin khan an Chairman leh Serchhip Bawrhsap Paul L. Khuma hovin Serchhip DC Meeting Hall-ah an thukhawm a, he thutkhawmah hian dilna lut 23 chu ngaihtuah niin ngun taka an sawiho hnuah Land Lease dilna 5 leh House Site dilna 17 te chu an pawm a, House Site dilna lut pakhat erawh hnawl a ni thung. Nimin-a heng dilna lut te hi Chanmari VC, New Serchhip North VC, New Serchhip South VC, Kawnpui North VC, Hmar Veng VC, Field Veng VC, P&E Veng VC leh Chhiahtlang South VC atanga lut a ni.

Serchhip District Sport Complex-a Multipurpose Hall sak tur chungchang ngaihtuahin nimin khan Serchhip DC Meeting Hall-ah Bawrhsap Paul L. Khuma hoin mi pawimawhte an thukhawm a. He hunah hian Serchhip District Sport Committee OB te leh Serchhip District Sport Association hruaitu pawimawh thenkhat te an tel a. Multipurpose Hall hi tuna Serchhip Sport Complex-a Basketball Court awmna hmunah din rawtna chu pawmin nimin vek khan Sports Association hruaitute, Engineer te leh Mizoram State Sports Council aiawh ten Serchhip District Sport Complex hi a hmunah an tlawh bawk a ni.

Nimin-a Mizoram Legislative Assembly Inkhawm ah PHE Minister Prof. Lalnilawma chuan ZPM member Lt. Col. Clement Lalhming-thanga zawhna chhangin Jal Jeevan Mission-ah Mizoram in Project 852 a thawh thu leh heng Scheme 842 te hi a taka zawh ni tawhin, mahse Fund hmuh kim a la nih loh avangin Scheme zawh tawh 842 zinga 368 chu Financially a la zawhloh a ni tih a sawi a. India ramah Mizoram chu performance tha zingah a tel thu pawh Minister chuan sawiin, JJM zawh tawhna ah Tui harsatna a awm thu pawh a sawi a. Tui hna a lo tlem tak avang leh a khawl lama harsatna, Tui pump tlem theih vang te a nih thu a sawi bawk.

Siaha District chhunga Bank hrang hrangte hmalakna thlirin nimin khan District Consultative Committee (DCC) leh District Level Review Committee (DLRC) te chu an thukhawm a, he hunah hian kumin April atanga July thla chhunga Bank te hmalakna thlirletin, hemi hun chhung hian Bank hrang hrang ten Financial Literacy Campaign (FLC) tum 66 an neih thu leh mi 1897 an tel thu tarlan a ni a. Tun quarter-a Credit Deposit Ratio (CD Ratio) chu 91.48% niin hei hi RBI in a standard 60% a dah aiin a sang a ni.

Sawrkar hnathawk leh Pensioner ten an hlawh atanga Mizoram Universal Health Care Scheme (MUHCS) atana contribution an pek chu cheng vbc. 5.10 a tling. Assembly Session neih zawh takah Congress Member C. Ngunlianchunga zawhna Health Minister Lalrinpuii’n ziaka a chhan danin, MUHCS hnuaiah July ni 31, 2025 thleng khan sawrkar hnathawk 36,324 leh pensioner inziaklut 10,163 an awm a. MUHCS atana sawrkar hnathawk hlawh atanga contribution an pek Finance Department atanga Mizoram State Health Care Society in a dawn tawh zat chu Rs. 3,78,79,200/- a ni a. Pensioner te contribution pek pawh Rs. 1,32,10,910/- a tling a ni.

Mizoram-a leilung hausakna awmte zawn-chhuaha hman tangkai dan tur ‘Unlocking Mizoram’s Mineral Potential: Exploration & Auction Frameworks’ tih thupui hmangin nimin khan Aijal Club-ah ni khat awh Workshop neih a ni a, Directorate of Geology & Mining, Mizoram leh Mineral Exploration & Consultancy Ltd. (MECL) te tangkawp in an buatsaih he hunah hian ramchhung hmun hrang hrang atanga mithiam rual te telin, Mizoram tana Leilung hausakna hrang hrang – Lungalhthei, Limestone, Oil leh Gas-te bakah Rare Earth Elements (REE) zawn leh laihchhuah chungchanga hmalak tawhnate, hmalak mekte leh hmalak zel dan tur chungchangte sawiho a ni.

Tun thla (August) ni 20 thleng khan Mizoram-ah Myanmar atanga raltlan mi 33,329 an awm mek. Mizoram State Legislative Assembly 9-na thutkhawm vawi 5-na nimin a zawhfel takah Rorellai Member, Aizawl West-III Bialtu MLA VL. Zaithanzama zawhna Home Minister K. Sapdanga'n ziaka a chhan danin, tun thla ni 20 thleng khan Mizoram-ah Myanmar atanga raltlan 33,329 an awm mek a. Raltlan chhinchhiah hna Mizoram District tinah thawh mek niin he hna zawh hun tur hi sawi theih a ni lo.

Land Revenue & Settlement (LRS) Minister B. Lalchhanzova chuan Riverine Reserve Forest (RRF) chungchang sawrkarin uluk taka a ngaihtuah thu nimin khan Assembly Session-ah House a hrilh a. MNF Member Prova Chakma zawhna chhangin Revenue Minister B. Lalchhan-zova chuan RRF Area huamchhunga tunhma atanga huan/ram/Inhmun pass nei tawhte ram chungchang ngaihtuahin sawrkarin hma a lak mek thu a sawi a, “Sawrkar tan ngaihtuah thiam a har. Special Investigation Team-te dinin fimkhur tak leh uluk takin ngaihtuah a ni,” a ti. LRS Minister chuan RRF chu kum 1965-a Assam Gazette-a chhuah a nih thu sawiin, “February 21, 2021 khan RRF Notification hi High Court chuan a thiat a, Supreme Court chuan April 24, 2024 ah notifcation hi a thiat,”tiin, Supreme Court-ah RRF chungchang hi a inchiah mek thu a sawi bawk.

Sports & Youth Services Minister Lalnghinglova Hmar chuan Bana Kaih (Handholding) Scheme hnuaia Empowering Mizoram Sports (EMS) hnuaiah a bultan nan mi 10,000 chuang training pek theih tura ruahman a nih thu a sawi.

Ni hnih (2) chhung awh Mizoram Legislative Assembly Fur thutkhawm chu nimin tlai khan tluang taka zawhfel a ni.

Mizoram Legislative Assembly Session nimin-a neih ah Subject Committee-II Chairman Lalchhuanthanga MLA chuan First Report of Subject Committee-II chu House-ah a pharh.

Chief Minister Lalduhoma’n Sawhthing leina man la pekchhuah loh chu pawisa an neih loh vanga pe lo an ni lo tih sawiin, “Fel lo chinfel ngai chinfel apiang te hnenah pekchhuah zel a ni,” a ti a. Agricultre Minister PC. Vanlalruata pawhin Sawhthing ching ve lo te'n Sawhthing-ah hlawkna tel an tum chuan harsatna a siam thu a sawi bawk.

Power & Electricity Department changtu Minister F. Rodingliana chuan Mizoram-ah Power-a intodelh tuma hmalak a nih thu a sawi.

Serchhip hmun-a Border Security Force (BSF) Sipai lakna neih tur chungchang chu nimin khan Bawrhsap hovin Serchhip DC Meeting Hall-ah Bawrhsap, Paul L. Khuma hovin sawiho a ni.

Serchhip District NCORD thutkhawm vawi 17-na chu nimin khan neih niin Ruihhlo do kawnga hmalakna hrang hrangte thlirho a ni.

Ramchhung hmundangte rualin tun thla ni 30 khian Serchhip-ah pawh ‘National Sports Day’ hman a ni dawn.

Nimin atanga neih Mizoram Legislative Assembly thutkhawm chu Vawiin hian chhunzawma zawhfel tum a ni a, Vawiin hian hun hmasa lamah zawhna leh chhanna hun hmangin ‘The Mizoram Local Bodies Ombudsman Bill, 2025’ leh The Mizoram Private Placement Agencies (Regulation) (Amendment) Bill, 2025’ te sawiho leh a ni ang.

 Mizoram Merchant Association (MIMA) chuan nimin khan thuchhuah siamin Hnamdang (vai) leh ramdang mi, Mizoram-a lut, dan lova sumdawngte list an siam dawn tih an tarlang a, he an thuchhuah ah hian ILP chu a Sponsor-tu leh a diltu Phone number leh address dik tak ziah nise, Proof thlap bawk se an duh thu sawiin, hnamdang sponsor-tute chuan an vai sponsor-te permit a tawpa thawn haw chu an mawhphurhna a ni tih hre thar leh se an duh thu an tarlang bawk a ni. Hei bakah hian MIMA thuchhuah chuan niminpiah khan Sairang leh Kawnpui inkar National Highway-306/06-an enfiah thu tarlang bawkin, lirthei tangkhang a tam loh dan awm theia an hriat thu an tarlang a, lirthei inpelhna point tam thei ang siam an duh thu leh kawng chhe zual lai thawmtha zung zung turin thawktu dah belh nise tha an tih thu an tarlang bawk.

Chief Minister Lalduhoma'n Inner Line Permit (ILP) Guideline ennawn mek a ni tih sawiin, Online-a tih tura buatsaih a nih thu a sawi. Nimin-a Mizoram Legislative Assembly thutkhawm ah Chief Minister chuan ILP inkaihhruaina online-a tih tur hmang hian Overstay an awm pawhin a hriat zung zung theih dawn tih sawiin, Mizoram-ah permit nei lo leh Overstay an tam hle nia a lan thu a sawi a. Mizoram chu firfiakte'n Camp an neihna atana hmun remchanga ngaih a nih tan tawh avangin Prime Minister, Home Minister. National Security Advisor, IB Director leh Home Secretary bakah Larsap ngei pawh hemi chungchang hi a sawipui tih sawiin, dan loa lo lutte leh an pass a tawp hnua awm khawtlaite dapchhuah runpui an neih dawn thu a hrilh thu a sawi a. Chu chu kalpui tan a nih thu leh Local Council huamchhungah kalpui a nih thu a sawi bawk.

Nimin a Assembly thutkhawm ah GAD changtu Chief Minister Lalduhoma chuan MNF Member K. Laldawngliana zawhna chhangin Chief Minister leh Minister-te lirthei pahnih theuh kawltir an nih thu House hrilhin, lirthei kawl te hi Official Car leh Spare Car a ni tih a hrilh a. Chief Minister tarlan danin, CM leh Minister-te lirthei kawl enkawlna atan hian kum 2023-2024 ah cheng nuai 9.5 leh kum 2024-2025 ah cheng nuai 13.24, a belhkhawmin cheng nuai 22.69 sen a ni. MNF Member Lalrinsanga Ralte zawhna chhangin Lalduhoma chuan January 1, 2024 hnulamah Chief Minister hman tur atan cheng nuai 29.79 man Toyota Innove Hycross VX & S lei a nih thu tarlangin, “January 1, 2024 hnulamah Minister-te hman tur bik motor lei a la awm lo,” a ti.

Mizoram Legislative Assembly thutkhawm nimin-a neihah Land Revenue & Settlement Department Dan dinglai siamthat rawtna, Mizoram (Land Revenue) (Amendment) Bill, 2025 pass a ni. Land Revenue & Settlement changtu Minister B. Lalchhanzova chuan he Bill hi pulutin, British-in India a awp hunlai khan Mizoram-ah Revenue Administration an kalpui loh avangin kum 1987-a Mizoram chu State puitling a nih thlengin Revenue Administration mumal nei lovin a awm tih a sawi a, kum 2013 khan The Mizoram (Land Revenue) Act, 2013 siam a ni a, he Dan hi a hmantlak loh hle a, central Scheme tha tak dawng thei turin dan neih mek chu siamthata tihchangtlun a tul thu a sawi a ni.

AH&Vety Department in an chhinchhiah danin kumin chhungin Mizoram-ah African Swine Fever (ASF) avangin Vawk 8185 thiin 3367 suat a ni tawh a. ASF vang hian Aizawl District-ah Vawk 383 a thi tawh a, Lunglei District-ah 655, Champhai District-ah 387, Siaha District-ah 3359, Lawngtlai District-ah 1771, Mamit District-ah 225, Khawzawl District-ah 1270 leh Hnahthial District-ah 135 te a thi tawh a ni.

GAD changtu Chief Minister Lalduhoma chuan nimin-a Assembly Inkhawm ah Congress Member C. Ngunlianchunga zawhna chhangin tun dinhmunah Sawrkarin District thar hawn tumna a nei lo tih a sawi a. Finance changtu ni bawk Chief Minister hian kum 2023-2024, kum 2024-2025 leh kum 2025-2026 (20/08/2025 thleng) chhunga hmun hrang hrang atanga sum puk zat chu cheng vbc. 5107.12 a nih thu a sawi a. Sum pukte hi a due date leh maturity angin demand notice dawn thin niin chutiang chuan rulh thin a nih thu a sawi bawk.

Rural Development & Administration Department changtu Minister Prof. Lalnilawma chuan Rural Development & Administration Department in SASCI hnuai atangin khaw 273-ah Library a sak thu sawiin, heng te hi sak zawh vek tawh a nih thu a sawi bawk.

Nimin-a Mizoram Legislative Assembly Fur thutkhawm tan ni-ah tunhnaia ram hruaitu boral ta pahnih- Mizoram Rajya Sabha MP hlui Ronald Sapa Tlau leh Dampa Bialtu MLA nilaia boral Lalrintluanga Sailo-te sunna hun hman a ni a. Heng mite sunna hunah hian Chief Minister leh House Leader ni bawk Lalduhoma, Leader of Opposition Lalchhandama Ralte leh party hrang hrang aiawhte'n an chanchin leh an ui thu te an sawi a, hemi hnu hian Member te chu ngawi reng-a minute khat dingin sunna an hmang a ni.

Mizoram-a Lakhuihthei thar tam ber zinga mi Sialhawk khua-a lakhuihthei chingtute chuan tunlai hian Lakhuihthei an seng mek a, kumin hian Quintal 7500 an hralhchhuak tawh a ni.

School Education Minister Dr. Vanlalthlana chuan January 1, 2024 hnuah Zirtirtu 320 an sawn (transfer) tawh thu a tarlang.

Mizoram Legislative Assembly-a Committee on Public Undertakings chuan nimin khan PSU pali- MAMCO, MIFCO, ZIIDCO leh ZO-HANDCO te chungchang an zirchianna leh rawtna an neih te Assembly House-ah an pharh.

Mizoram Legislative Assembly thutkhawm nimin-a neih ah Assembly Committee peng hrang hrangte chuan Report an pharh.

Mizoram Legislative Assembly chuan kutdawh khapna Dan siamna tur, Mizoram Prohibition of Beggary Bill chu nimin khan an pawm.

Mizoram Assembly Fur thutkhawm tan ni nimin khan Mizoram-a Forest (Conservation) Amendment Act hmanna tur chu pawm a ni.

Health Minister Lalrinpuii chuan Mizoram-a mimal damdawi In (Private Hospital) te'n pawisa pek lawk ngai lo (cashless) hmanga damlo enkawl an la pawm ngei an beisei thu a sawi.

Mizoram leh Assam ramri buai chingfel turin Official Level-ah Mizoram-ah inbiak leh tum a nih thu Home Minister K. Sapdanga chuan nimin-a Assembly Session-ah sawiin, India leh Myanmar ramri hung chu sawrkar laipui thuneihna a nih thu a sawi a, “Hmalak mek a ni,” a ti bawk.

Mizoram-ah BSF Constable (GD) 300 lak a ni dawn a, Centre pathum - Serchhip, Aizawl leh Lunglei-ah atangin mi 100 theuh lak an ni ang. Serchhip-a BSF Sipai lakna neih tura hriat tur pawimawh te :

Tunhnaia Mizoram Police Constable atana lak thar te tana Training hawnna chu nimin khan Thenzawl-a Police Training School-ah neih a ni a, he hun hmanpuitu Home Minister K. Sapdanga chuan Police lak thar te chu an Uniform hakin a entir - discipline a taka lanchhuah tir turin a chah bawk.

Nimin khan Serchhip-ah District Level Committee on Nasha Mukt Bharat Abhiyan chu an Chairman leh Bawrhsap, Paul L. Khuma hova thukhawmin ruihhlo dona kawnga hmalakna tur hrang hrang an sawiho.

PHE Department, Green Herd SP leh UD&PA Department tangkawp ten Serchhip District chhunga thingtlang khua bakah khawpui chhunga bawlhhlawh an lakkhawma an sawngbawlna hmun, Solid Waste Management Centre, Serchhip chu nimin khan PHE Department-a Project Management Unit-a Director, Er. Lalropuia Hmar chuan a hmunah a tlawh a, helai hmuna hnathawh dan a enpui bakah hnathawktute hnathawh a enpui nghal bawk a ni.

Nimin khan Serchhip-a BRC Hall-ah ‘The Quantum Age Begins : Potentials and Challenge’ tih thupui hmangin District Level Student’s Science Seminar, 2025 neih a ni.

Serchhip District-a Myanmar raltlan awm te an kutzia leh pianphung chhinchhiahna tura Biometric Enrolment chu tluang taka kalpui leh mek niin nimin khan Chhuanthar Tlangnuam-ah he hna hi thawh chhunzawm leh a ni a, raltlan mi54 te chu an kutzia leh puanphung te chhinchhiah leh an ni. Serchhip District-ah hian chhinchiah danin khaw 29-ah raltlan hi an awm a, nimin thleng khan khaw 13-ah Biometric Enrolment hi kalpui ni tawhin heng ah hian raltlan mi 373 chhinchhiah an ni tawh a, raltlan chhinchhiah tam tak chu an kir leh tawh avangin raltlan chhinchhiah sa aiin Biometric Enrolment tih hi an tlem zawk a ni.

Kan ram leh hnam damlohna chhan hi eng nge ni? - Rev. Dr. Zaichhâwna Hlâwndo

Dampa Bial-a Assembly by-election neih turah ZPM in an Candidate tur an puan hnuin MNF  leh Congress party chuan Nomination Committee an la din loh thu an sawi a. BJP Mizoram in Nomination Committee an thutkhawm tawh thu sawiin, PC Party chuan by-election hi an la ngaihtuah loh thu an sawi bawk. He Bial-a by-election neih tur atana Electoral Roll ennawn hna chu thla thar lamah thawh tan a ni dawn a ni.

Lai Autonomous District Council (LADC) a United Democratic Alliance (UDA) kaihhruai sawrkar thar din a nih hnuah nimin khan Executive Member (EM) tur mi 9 te chu rinawmna thu tiam tira lakluh an ni a, heng EM lakluh thar te hi Sanghuliana Mualchin, C. Rongura, C. Lalsawmzuala, Andrew Laltlanzara, Lalropuia Chinzah, L. Daniala, C. Hrangthianga, HC. Lalthawmliana leh H. Lalmuansanga te an ni a. An hna chanpual tur pawh nimin vek khan CEM, N. Zangura chuan a puang nghal bawk a ni.

Sawrkar laipui chuan Mizoram, Odisha leh Tripura-a khawtlang inrelbawlna tihchak nan cheng vbc. 284 chuang a pechhuak a, heng sum te hi Finance Commission 15-na (XV FC) Untied Grants hnuaiah a pechhuak a ni. Mizoram chuan kum 2023–24 Grant atangin Village Council tling 827 tan cheng vbc. 14.2761 a dawng a, heng sum hi faina leh thianghlimna kawnga mamawh bulpui hna thawh nan te, In atanga bawlhhlawh paihchhuah sawngbawlna leh ruahtui khawlna atan te hman tura ruahman a ni.

Lunglei District chhunga Bank hrang hrang te hmalakna thlirin nimin khan District Consultative Committee (DCC), District Level Review Committee (DLRC) leh District Level Security Committee (DLSC) thutkhawm neih a ni a, he thutkhawm kaihruaitu Bawrhsap Navneet Mann chuan loan rulh that loh (non performing assets -NPA) awmte chinfel thuai a nih theih nan Bank te chu theihtawp chhuah tura chahin, mipuite hnena sum enkawl thiam zirtirna (Financial Literacy Campaign-FLC) pawh a tam thei ang ber buatsaih turin a chah bawk. He huna tarlan a nih danin Lunglei District-ah hian Bank ten sum an dawn atanga Loan an pekchhuah chhutna, Credit/Deposit Ratio (CD Ratio)-ah Lunglei District-a Bank Branch 23 ten 1st Quarter 2025-26 chhungin CD Ratio 69.95% an nei a ni.

Mizoram Legislative Assembly Fur thut-khawm chu Vawiin hian neih tan a ni dawn a, ni hnih (2) a awh ang.

Mizoram-ah Online Games lama inbumna a hluar chho hle a, heng zingah hian Mobile Legends leh PUBG-ah te inbumna a tam zual tih Mizoram Cyber Crime Police ten an sawi.

Mizoram hmun hrang hranga PHE Department hotute chuan nimin khan an Minister Prof. Lalnilawma hovin PHE Department in harsatna a tawh hrang hrang te sutkian dan tur an sawiho.

School Education Minister Dr. Vanlalthlana’n Mizoram Secretariat chu e-filing system veka kalpui a ni tawh tih sawiin, Department hrang hrangah pawh Digital veka File kaltir tum ani tih a sawi.

Nimin khan Kolasib-ah District Level Security Meeting chu Bawrhsap, Robert C. Lal-hmangaiha hova neih a ni.

Tunhmaa Mizoram-a BSNL Exchange ni thinte ‘Online Exam cum Skill Training Centre’ a lehlin remtih a ni.

Serchhip Sub-Hqrs. YMA ten an enkawl, YMA Social Forestry Chhunkhah-a hman turin Serchhip DC Office-a DM&R chuan tuichenna atana hman tur Life Jacket 4 leh tui-a pil theihlohna hmanrua (Lifebuoy ring) pathum bakah Hruizen Roll khat an hlan a, heng te hi Inrinni khan Chhunkhah-ah hian a tul anga hman turin dah nghal a ni.

Serchhip Chhim Veng-a Modern M/S hmun chu Chawngbuangi Memorial School atan luah lailawk a ni dawn a, thla thar atangin School kal hman tura ruahman a ni.

Serchhip District-a Myanmar raltlan te an kutzia leh pianhmang chhinchhiahna tura Biometric Enrolment kalpui mek chu kar hmasa ah Portal lam chian loh avanga chhunzawm theih a nih loh hnuah nimin khan chhunzawm a ni leh ta a. Nimin khan Chhiahtlang South VC area-a raltlan te chhinchhiah hna thawh ah mi 16 chhinchhiah leh an ni a, ruahman lawk ang chuan Vawiin hian Chhuanthar Tlangnuam-ah Biometric Enrolment hi kalpui leh a ni ang. Nimin thleng khan Serchhip District-ah hian raltlan mi 319 te Biometric Enrolment hi tih a ni tawh a ni.

Aizawl City Bus hmangtute'n awlsam leh rang zawka an tum ram an thlen zung zung theih nan leh Traffic jam a tih ziaawm theih beiseiin State Transport Authority chuan thla thar September leh October, 2025 chhung hian ‘Pick & Drop System’ chu an enchhin dawn a, Aizawl City Bus-te chu an Stand-ah passenger lak leh chhuk chhung chauh dingin, an tlan nghal thin dawn a ni. He Pick & Drop System enchhinna tur hi mipuite hmakhaw ngaia ruahman a nih angin lo zawma lo hmang tangkai thin turin mipuite chu ngen an ni.

Chief Minister's Rubber Missions kalpui mek chungchang chu nimin khan Chief Minister Lalduhoma hovin sawiho a ni.

Dampa Bialtu MLA Lalrintluanga Sailo chu a boral tak avanga he Bial-a by-election nei turin inbuatsaihna kalpui mek a ni a, hemi atana Electoral Roll ennawn hna chu kalpui tan tura ruahman niin kumin July 1-a kum 18 tling chin te lain Electoral Roll ennawn hna hi thawh a ni dawn a, hemi atan hian September 2 khian Draft Electoral Roll tarchhuakin hming thun, paih leh siamthat ngai te tan September 17 thlengin hun hawn a ni anga, Final Roll chu September 30-ah tarchhuah a ni ang. He Bial-a by-election neih hun tur hi hriat la ni lo mah se kumin kumtawp lamah chuan inthlanna hi neih a nih a rinawm a ni.

Ni hnih chhung awh All India Speakers' Conference chu nimin leh niminpiah khan New Delhi Legislative Assembly-ah neih niin Mizoram atangin Speaker Lalbiakzama leh Deputy Speaker Lalfamkima te an tel a, Motto-ah ‘Commemoration of Centenary of Veer Vithalbhai Patel’ tih hmangin India mi Central Legislative Assembly President/Speaker atana thlan (elected) hmasa ber kum 100 tlin lawmna hun hman a ni. He hunah hian Union Home Minister Amit Shah te, Union MoS for Parliamentary Affairs Kiren Rijiju te, Delhi Chief Minister Rekha Gupta leh sawrkar mi pawimawh te an tel a ni.

Mizoram sawrkar, Mizoram Synod leh tlawm-ngai pawl te tangtlang in ruihhlo ngai te enkawlna tura an buatsaih ‘Hulhliap-Short Stay Centre’ chu a thawh thumna atan nimin khan Synod Revival Camping Centre, Neihbawih-ah kalpui tan a ni leh ta a, Hulhliap-Short Stay Centre 3rd Batch ah hian mi 173 te admission pek niin tun tum hi ruihhlo ngai khawlaia riak thinte tan deuh a tih a nih angin Veng hrang hranga khawlaia tei rawlai te lak an ni hlawm a ni. Hulhliap-SSC hi ni 15 chhung Sawrkarin an enkawl anga,a tawp ni 5 chhung chu Synod Revival Team in an enkawl thung dawn a. Tuna 3rd Batch-ah hian Speaker atan Lalhriatkima (Holy Fire Team) a ni ang.

Mizoram Sawrkarin Ruihhlo Do Beihpui (Special Drive on Drugs) a thlak turah Myanmar leh India ram inrina Tiau lui atanga Mizorama Ruihhlo (drugs) a lo luhna kâi khàn awmna khua zawng zawngte fang a, khawtlang hruaitute nena inkawmhona hun buatsaiha hun hmanpui turin Mizoram Police IGP H. Ramthlengliana IPS hovin Central YMA hruaitute chuan nimin khan Aizawl chhuahsanin Champhai an thleng a. Nimin vek khan Champhai Tlangsam khawtlang hruaitute nen Tlangsam YMA Hall-ah hun hmangin Zote Community Hall-ah Zote, Ngur leh Ngur Vengsang khawtlang hruaitute nen an inkawm bakah Bulfek khawtlang hruaitute nen an in kawm leh bawk a ni.

Hrangturzo Bialtu MLA leh Adviser to CM Lalmuanpuia Punte chuan nimin-a an Party Chhung Inkhawm an neih ah Tlawmngai pawl (NGO) inthlanah ZPM Party an inrawlh ve ngai lo tih a sawi a, “Kalphung thar mipui sawrkar kan din mekna ah ZPM chuan tlawmngai pawl (NGO) hrang hrangte a tha zawnga an hmalakna thlawpa kan thawhpui laiin, an inthlannaah erawh kan inrawlh ngai lova, ZPM sawrkar hnua NGO inthlanna awm tawh, MHIP, MSU leh MJA inthlanaah Party leh sawrkar a inrawlh lo,” a ti a. “Kan hmaa MZP inthlan awm turah pawh inrawlhna kan nei lova, sawrkar leh party-in sum pawh kan pe lo. Pawl hruaitu tha tak thlangchhuak turin duhsakna kan hlan a, tute pawh tling se tha taka thawhpui kan tum a, anni pawhin tha taka min thawhpui kan beisei,” a ti bawk.

National Trade Union of Mizoram (NTUM) chuan Works Department pathum- PWD, PHE leh P&E Department-a Muster Roll-a awm mekte Provisional Employees (PE) a hlankai an nih theihna atan Minister pathum an hmu. NTUM hruaitute chuan thuchhuah siamin Chief Minister thurawn angin P&E Minister F. Rodingliana, PWD Minister Vanlalhlana leh PHE Minister Prof. Lalnilawma-te chu PWD, PHE leh P&E Department-a MR-a thawk mekte PE-a hlankai an nih theihna tur atan an hmu tih an tarlang a, an lo dawnsawn danah an lawm thu an tarlang bawk a. An Department chan theuha Proposal siam tura NTUM-in an ngen angin Commissioner Secretary/Secretary hnen-ah ziakin department theuhte September 2025 chhunga proposal siam a Department of Personnel & Administrative Reforms (DP&AR) a thehlut tura an ngenna ah hma an laksak avangin lawmthu an sawi a, a hlawhtlin ngei theih nan beiseina sang tak nen an thlir reng dawn tih an tarlang a ni.

Thla thar September 12-a Prime Minister Narendra Modi-a’n Mizoram-a Rel kawng siam thar hawng tura Mizoram a rawn tlawh tur chungchangah Inrinni tlai khan Chief Minister Lalduhoma chuan a chenna In-ah Railway Board-a CEO leh Chairman Satish Kumar, Ex-Officio Principal Secretary to the Government of India ni bawk chu a kawm a, Chief Minister hian Railway lamin National Highway atanga Rel kawng panna kawng (approach road) an laih leivungin National Highway side drain a vur avanga harsatna chungchang pawh sawipuiin, Side drain te siam tha a, concrete Slab te-a khuh turin a hrilh a. Hei bakah hian Railway Compensation la chinfel loh an nei nia a hriat thu pawh lo hrilhin, a rang lama chingfel turin a lo ngen a ni. He hunah hian Chief Minister hi Commissioner & Secretary to CM Vanlaldina Fanai chuan tawiawmin Chief Minister thu sawi te hi a lo umzui tur thu Satish Kumar hian Chief Minister hi a hrilh a, he hunah hian Northeast Frontier Railway thuneituten an tawiawm bawk a ni.

Aizawl Zemabawk Veng-a Cancer Hospital-a inenkawl mek te Aizawl khawpui pawn km 20 piah lam mi te tana a thlawn veka awmna tur India rama damdawi siamchhuaktu lian tak INTAS Foundation-in a din ‘Apna ghar’ chu damlo te'n an hmang tangkai hle.

Mizoram sawrkar-a Health & Family Welfare Department chuan tunhnaiah Health Worker mi 31 te dahngheh chungchang chu thuchhuah siamin a sawifiah.

Mizoram-ah Thih hnua midang tana Mit (eye) pe tura intiam mi 9231 an awm tawh a, Corneal Transplant tawh ti tawh mi 593 awmin kumin April atangin Mizoram-ah Mit pe (Eye Donate) 32 an awm tawh bawk.

Dampa Bialtu MLA Lalrintluanga Sailo chu a boral tak avanga he Bial-a by-election neih turah ZPM party chuan Vanlalsailova chu an Candidate tur a nih thu nimin khan an puang.

Mizoram sawrkar-a Women & Child Development buatsaihin nimin khan Early Childhood Care & Education chungchanga inzirtirna leh Field Level-a hnathawhna tur Smart Phones semna hun buatsaih a ni.

Chief Minister Lalduhoma chuan Mizoram State University din tum mekah Administrative Building chu Luangmual-a sak tum a nih thu sawiin, Mizoram Engineering College chu kum 2026 Academic Year atanga zirna tan tumin thawktu lak an nih dawn thu a sawi bawk.

Nimin August 24, 2025 kha Salvation Army, India Eastern Territory-a Khawngaihtu pawl (League of Mercy) Pathianni a ni a, he ni pual hian Salvation Army Serchhip Corps-a League of Mercy te chuan nimin khan District Hospital Serchhip Poor Fund-ah pawisafai an hlan a ni. Salvation Army India Eastern Territory-ah hian League of Mercy rawngbawlna hi August ni 1, 1994-ah butan a ni a, tun dinhmunah Corps 121-ah rawngbawlna kalpuiin Member 9848 an awm mek a, an Kohhran ni kher lo pawh he rawngbawlna ah hian a tel theih a ni.

Serchhip District-a Myanmar raltlan awm te tana Biometric Enrolment kalpui mekah mi 300 chuang chhinchhiah ni tawhin Zirtawpni-a he hna thawh tura ruahman chu khawl lam that loh avangin chhunzawm theih a ni lo thung.

Telengana khawpui Hyderabad-a Badminton World Federation (BWF) Junior Ranking Tournament khelh mek, Kotak India Junior International Series 2025-a Serchhip Ramthlun Veng tleirawl, Lalrempuii d/o Albert Lalrosanga (L) chuan Women’s Doubles-ah Zenith Abbigail nen inkawpin Bronze Medal an la a, Semi Final-ah Keerthy Manchala leh Varna Prabu Anand te hneh lovin Bronze Medal an la a ni. He inelna ah hian C. Lalramsanga s/o C. Lungmuanpuia, Durtlang chuan Men's Soubles-ah Bhavya Chhabra nen inkawpin Silver Medal an la bawk a ni.

Serchhip District Volleyball Association te buatsaih, Season Opening Tournament chu Inrinni khan New Serchhip Volleyball Court-ah khelh zawh a ni a, Mipa Final-ah Vengchung VC in New Serchhip VC chu 3-2 a hnehin an Champion a, Hmeichhe inelna ah Darnam VC chuan New Serchhip VC chu 3-1 a hnehin an Champion bawk. He inelna ah hian Mipa-ah Team 18 telin Champion Team hian lawmman ah Trophy leh Rs. 15,000/- dawngin pahnihna in Trophy leh Rs. 8000/- an dawng a. Hmeichhe inelna ah Team 5 telin Champion hian Trophy leh Rs. 10,000/- dawngin pahnihna hian Trophy leh Rs. 5000/- an dawng bawk a ni.

Mizo Zirlai Pawl (MZP) chuan New Delhi-a UPSC Coaching-a kal tûrin Remruatfela s/o Zolawma leh Obadia Zorinpuia s/o Lalchhuanmawia te an thlang. MZP hian Mizo thalaite UPSC Combined Competitive Exam-ah a tam thei ang ber an tlin theih nan hma a la thin a, an hmalâkna kal zêlah hun hmasa lamah UPSC Coaching, New Delhi-a kal tur hian mi pahnih a lo sponsor tawh a. North East Students’ Organisation (NESO) chuan North East States-ah UPSC tling an tlêm tual tual avângin kumin 2025 hian North East State tin atangin mi pahnih a sponsor dâwn a, MZP leh NESO tangkawp chuan Mizoram atanga sponsor tûr hi Written Examination leh Personal Interview hmangin a thlang a heta tang hian heng mi pahnih te hi an thlang ta a ni, Heng mi pahnih te hi an Coaching kalna tur zawng zawng NESO leh MZP chuan a tumsak dâwn bakah an awmna tur a ngaihtuah sak dâwn a, thlatin stipend an dawng dâwn bawk a ni. Coaching kal turte hi Next IAS Institute, New Delhi-ah an kal dawn a ni.

Tunkar Nilaini leh Ningani-a Mizoram Legislative Assembly Fur thutkhawma ngaihtuah turin sawrkar Bill pathum a lut tawh a, heng Bill lut te hi Land Revenue & Settlement Department atangin 'The Mizoram Land Revenue Amendment Bill, 2025'; Social Welfare Department atangin 'The Mizoram Prohibition of Begarry Bill, 2025' leh UD&PA atanga lut 'The Mizoram Local Body Ombudsement Bill, 2025' te an ni a. Session a ngaihtuah tur hian EF&CC Department atanga lut Official Resolution pakhat awmin paper lay tur 8 a awm tawh bawk. Hriat theih chinah Session a chhan tur hian tawngka a chhan chi zawhna 'Sstarred question' 242 leh ziaka chhan chi zawhna 'Unstarred question' 120 a lut tawh bawk. Session tan ni-ah hian tunhnaia boralta Dampa Bialtu MLA Lalrintluanga Sailo leh Rajya Sabha MP hlui Ronald Sapa Tlau sunna hun hman a ni ang.

Kar kalta Thawhlehni, August 19, 2025-a Aizawl Maubawk Veng-a cheng Runliani (Pi Luti) thattu chu Police ten an chhui zui hnuah tualthattu ni ngeia hriat Vanlalmuanchhana (21), Maubawk Veng bawk chu Police ten an man a, a inpuanna atangin tualthattu ni ngeia hriat niin Runliani bag a lo kawl atangin hriatchhuah a ni a, a kut atang hian cheng sanghnih vel hmuh let a ni bawk.

Sports & Youth Services Department changttu Minister Lalnghinglova Hmar chuan Zirtawpni khan Tuirial Airfield hmun hlui tlawhin tangkai zawka helai hmun hman theih dan tur a en a. He hunah hian S&YS Department, National Cadet Corps (NCC), Mizoram State Sports Council (MSSC) leh Tourism Department lam aiawhte pawh telin Tuirial Airfield-a Tourism Department hmunhlui ram tawhte chu hman tangkai dan tur enho a ni a. Mizoram thalaite tana tangkai tak tur NCC Academy din nan hman a nih theih leh theih loh te thlirin, ruahmanna siam ngai te an siam a ni. Tuirial Airfield hmun hlui hi NCC Academy mai ni lo, NCC Air Wing-te tana Thlawhtheihna khalh zirna (special flying training) atan hman theih a nih leh nih loh te, tunlai khawvel mamawh Drone technology zirna hmuna siam theih a nih leh nih lohte an enho nghal a ni bawk a. Hei bakah hian Sports hmunhma atana hman tangkai theih chin a awm leh awm lohte thlirho nghal a ni bawk. Tourism Minister ni bawk Lalnghinglova Hmar ho hian Tuiri...

Tlabung Village Council te chuan Zirtawpni khan Larsap General VK. Singh chu Raj Bhavan-ah hmuin Tlabung khua chu tun hma ata tawh khaw pawimawh an nih thu ram hruaituten hrilh fo mah se, hma an sawn theihna tura theihtawp chhuahpuitu erawh an la nei mang lo niin an sawi a, Tlabung chu a awmna avangin a mi chengte tan mai ni lo, Mizoram pum tan khaw pawimawh ni thei tih hrilhin, a bikin khualzinte hip theihna tura hmalakna atana Sawrkar laipuiin Scheme a duan te an chhawr phak ve theih nan hma lak sak turin an ngen bawk.

All Mizoram CSS Employees Coordination Committee chuan CSS Employee tana duan, CSS Regularization Scheme 2024 hmanga Health Department hnuaiah Provisional Employee mi 31 dahngheh an ni chu an lungawi loh thu sawiin, tunkar Zirtawpni, August ni 29 hmaa sut turin Sawrkar an phut.

Mizoram BJP President Dr. K. Beichhua chuan, Mizoram-ah BJP chu mipuiin an ngaina in an thinlungah a tla na tan hle niin a sawi. Inrinni khan Mizoram BJP hian Aizawl-a an Party Office-ah Party kalphung leh Inrelbawl dan chungchang zirtirna leh infuihtharna an nei a. he hunah hian State President Dr. K. Beichhua chuan Mizoram-ah BJP chu mipuiin an ngaizawng tan mek tih sawiin, chak taka party a kal zel theih nan thawhhona tha te, inpumkhatna tha te an neih a pawimawh tih a sawi a. BJP chu party lian tak leh Inrelbawlna zir tham a ni tih sawiin, party-a nihna chanvo chu lal anga rorelna tur ni lovin, hnathawhna hmanrua a nih thu a sawi bawk a ni.

Mizoram-ah kum kalta 2024 chhung khan Doctor ten mitthi te an thihna chhan an chhinchhiah mi 4329 awmin thihna thlentu zingah kawchhung lam tha lo chu a tam ber an ni a. Kawchhung lam tha lo zingah hian Thin (liver) tha lo vanga thi chu an tam fal hle bawk a ni.

Mizoram-ah Thih hnua midang tana Mit (eye) pe tura intiam mi 9231 an awm tawh a, Corneal Transplant tawh ti tawh mi 593 an awm bawk.

Chief Minister Lalduhoma chuan Inrinni khan Aizawl Chawnpui Veng-a ‘PM Ekta Mall’ sakna tur lungphum a phum a, he Mall hi sak zawh a nih hunah khawvel Market thleng phakin Mizoram kutchhuakte zawrh a ni dawn tih a sawi.

Gauhati High Court Judge, Justice Michael Zothankhuma chuan Dan chi hrang hrang hmanga hmeichhe naupangte chanvo leh humhimna zawm that a pawimawh thu a sawi.

Mizo ten ‘Rannung seh’ kan tih mai ‘Scrub Typhus’ vei kum tinin an pung zel a, kumin ah he hri kai hi mi 12,470 hmuhchhuah an ni tawh a. Hetihlai hian Rannung seh-ah Rul sa a that leh that loh chu finfiahna a la awm loh vangin natna enkawl nan hian a that leh that loh hriat a la ni lo.

Aizawl District chhunga awm Mauchar leh Sakawrdai inkar kawng chu lirthei kal theih loh khawpa a chhiat avangin he kawngpui in a paltlang khua a chengten harsatna an tawk mek.

Inrinni kalta, August 23, 2025 kha kum 2023-a India ramin Thla leilung-a Chandrayan 3 hlawhtling taka a tum tirna champha puala sawrkarin ni pawimawh a puan, National Space Day a ni a, India ram pumah kawng hrang hranga hman a ni.

Serchhip khawpui cheina tura hmalakna, Serchhip Beautification Project hnuaia hmalakna hrang hrangte chu nimin khan Bawrhsap Paul L. Khuma hovin thlirho a ni.

Serchhip Kawnpui South Branch YMA te chuan ruihhlo dona kawngah nasa zawka hmalak an tum.

Mizoram Presbyterian Kohhran Chhimchhak Presbytery Kristian Thalai Pawl (KTP) Meet vawi 8-na chu nizan atang khan Penial Kohhran Biak In, IOC Veng-ah neih tan a ni a, naktuk Pathianni zan thleng a awh ang. Chhimchhak Presbytery Kristian Thalai Pawl (KTP) Meet hi KTP General Conference neih loh kum ah neih thin niin kumin hian thupui atan ‘Um rawh, i um pha ngei ngei ang’ tih chu hman niin Speaker atan Rev. Dr. R. Vanlaltluanga, ATC chu hman a ni bawk. Chhimchhak Presbytery huamchhungah hian Pastor Bial 5 a awm a ni.

Baptist Church of Mizoram (BCM) Serchhip Pastor Bial Fakna Inkhawmpui chu nizan atang khan BCM Biak In, Serchhip-ah neih tan a ni a, naktuk Pathianni zan thleng a awh ang. He Fakna Inkhawmpui-ah hian thupui atan ‘Lalpa fak rawh u’ tih chu hman niin Speaker atan Upa PC. Vanlalrova hman a ni a, Aizawl Area Baptist Choir leh zaithiam dang te he hun hi an rawn hmanpui bawk a ni.

Mizoram pumah a vawikhatna atan Electric Billing System chi khat, UGO Electric Billing Software thar chu hman tan niin nimin khan a tlangzarhna hun hman a ni a. P&E Minister F. Rodingliana chuan he Software thar hi a tlangzarh a ni.

Nimin khan State Level Orientation On Aadi Karmayogi Abhiyan – Responsive Governance Programme chu Planning & Programme Implementation Department  changtu Secretary Lalmalsawma IRS hovin Secretariat Conference Hall-ah neih a ni.

Zoram Medical College & Hospital-in NQAS Certified Hospital an nih lawmna chu nimin khan neiin Health Minister Lalrinpuii chuan a hmanpui a, MUHCS hnuaia thuam thar, Private Cabin leh ICU khum dah belh te a hawng nghal bawk.

Siaha Officers’ Club (SOC) te chuan nimin khan Siaha-a MADC Golden Jubilee Hall-ah zirlaite tan Career & Vocational Guidance Programme an buatsaih a, he hunah hian MADC-a Clinical Veterinary Officer Dr. HC. Joane Mary leh District Labour & Employment Office-a Deputy Director Reuben T Kompa te chu Resource person-ah hmangin zirlaite hmalam hun atana kaihruai thei tur thupui hrang hrang hmangin zirtirna an pe a, pawl 10 zir zawha Career awm leh zir chhoh zel dan chungchangah zirtirna pein zirlaite chu tumruhna nen an nih tuma chiang tlat turin leh a hma lama mahni tuina hre turin an chah bawk a ni.

Prime Minister Narendra Modi chuan thla thar Sept. 12 khian zan khat riakin Mizoram a rawn tlawh dawn a, a tuk Sept. 13-ah Sairang leh Bairabi inkar Rel kawng a hawng dawn tih Chief Minister Lalduhoma chuan a sawi a. Chief Minister chuan Prime Minister Narendra Modi-a’n an rel kawng a hawn tur chungchangah hian Union Railway Minister Ashwini Vaishnaw nen an inbe zing hle tih sawiin Mizoram sawrkar chu theihtawpin a inbuatsaih a ti a, World Class Rel Station-a thuam tur leh Rajdhani Express service thei tura ruahman a nih thu sawiin, Inner Line Permit (ILP) check-na tur Counter an siam pawh pehhelna tur a awm dawn lo tih a sawi.

India rama sawrkar damdawi In tha bik tehna, National Quality Assurance Standards (NQAS)-ah Mizoram atangin Lungdai PHC leh Rawpui-chhip PHC chu an tling thar ve leh a, a tehna ah Lungdai PHC-in 92.92% leh Rawpuichhip PHC-in 84.67% hmuin NQAS National Certificate an hmu a ni. Heti hian Mizoram puma PHC awm zingah NQAS National Certificate hmu 31 an awm ta a ni.

Lai Autonomous District Council (LADC) a sawrkar inthlak boruak kal mekah nimin khan Protem Chairman Lalthanmawia Colney kaihhruai in LADC Chairman thlanna neih a ni a, UDA lam atanga Chairman thlanna chuh tura hming pelut, Lawngtlai Vengpui Bialtu MDC, VL. Hmuaka chu chuhtu awm lovin Chairman thlantlin a ni a, Chairman thar hian a thutna a luah zui a ni. Hemi hnu hian Chairman thar VL. Hmuaka kaihhruaiin thutkhawm nei lehin LADC-a CEM thar N. Zangura’n thlawptu a neih dan fiahna neih leh nghal a ni a, CEM thlawp lamah Member 14 in ban pharin, thlawplo.lamah Member 5 in ban an phar a, Chairman VL.Hmuaka chuan CEM N. Zangura chuan fiahna a paltlang thu House-ah a puang a ni.

India Today-in India rama University tha a tehnaah Mizoram University chu General (Government) huangah 25-na niin, hmarchhak State zinga titha ber a ni. Ramchhunga chanchinbu lian zinga mi India Today in kum khat chhunga zirna In sang titha zual a thlanchhuah thar berah hian Mizoram University chu sawrkar enkawl University, General (Govt.) huangah 25 niin nikum a 26-na a nih aiin hma a sawn hret a, mark 2000 atangin 1153.7 hmuin hmarchhak State zingah a titha ber a ni. University tha tehna ah hian General huangah University of Delhi chu pakhatna a ni a, Jawaharlal Nehry University chu pahnihna niin, Aligarh Muslim University chu pathumna a ni bawk a ni.

Chief Minister Lalduhoma chuan Mizoram Police Constable recruitment neih tawh zawng zawnga belhchian dawl ber leh fair ber tia sawi ngam, Constable Recruitment tunhnaia neih ah Police 259 lak thar an ni tih sawiin, Lok Ayukta thuamthain Inquiry Wing hawn belh a nih thu a sawi.

Mizoram sawrkar in Bana kaih a kalpui mek chu thla thar September 20 atang khian dilna thehluh theih beisei a ni.

Home Minister K. Sapdanga chuan thil eng pawh kan tihna ah hlawhtling tur chuan thawh-rimna a pawimawh hmasa ber tih a sawi.

Kumin October 14 khian Mizoram-a District pali-ah Zeng hri danna pek beihpui thlak a ni leh dawn.