Zirtawpni hmaa sut leh turin sawrkar an phut

All Mizoram CSS Employees Coordination Committee chuan CSS Employee tana duan, CSS Regularization Scheme 2024 hmanga Health Department hnuaiah Provisional Employee mi 31 dahngheh an ni chu an lungawi loh thu sawiin, tunkar Zirtawpni, August ni 29 hmaa sut turin Sawrkar an phut.

    All Mizoram CSS Employees Coordination Committee hi Zirtawpni khan Aizawl-a Vaivakawn YMA Hall-ah thukhawmin kumin May ni 19-a CSS hnuaia thawkte an ngheh theihna tura Sawrkar an ngenna chu tun thlengin chinfel a la nih loh laia August ni 21-a Health Department hnuaia Provisional Employee mi 31, CSS Regularization Scheme 2024 hmanga dahngheh an ni chu an hrethiam lo tih an sawi a. CSS Regularization Scheme 2024 chu CSS Employee tana duan a nih thu sawiin, Vawiin thlenga a Scheme neitu CSS hnuaia thawkte dahngheh an la nih loh laia, Provisional Employees-te hman tir a ni chu thil dik ni-a an hriat loh thu leh an lung a awi loh thu an sawi a, hei hi tunkar Zirtawpni hma ngeia sut turin Sawrkar an phut a, an beisei anga hmalakna a awm lo a nih chuan an kal zel dan tur an ngaihtuah leh dawn tih an sawi bawk.