State pahnih ramri buai chingfel turin Mizoram-ah Official Level-a inbiak leh tum a ni

Mizoram leh Assam ramri buai chingfel turin Official Level-ah Mizoram-ah inbiak leh tum a nih thu Home Minister K. Sapdanga chuan nimin-a Assembly Session-ah sawiin, India leh Myanmar ramri hung chu sawrkar laipui thuneihna a nih thu a sawi a, “Hmalak mek a ni,” a ti bawk.

Nimin-a Mizoram Legislative Assembly thutkhawm ah Home Minister K. Sapdanga chuan MNF Member K. Laldawngliana zawhna chhangin Mizoram leh Assam ramri buai chingfel tur hian State pahnihte kum 1988 atangin vawi 10 chuang an inbiak tawh thu sawiin, “August 9, 2024 khan Mizoram sawrkar leh Assam sawrkar aiawhte chu Mizoram leh Assam ramri buai chungchang sawihoin Mizoram-ah an inbia (High Level Meeting) a ni,” a ti a. Ramri buai chingfel turin State pahnihte April 25, 2025 khan Official Level-in Guwahati, Assam-ah an inbiak thu sawiin, “Ramri buai chingfel turin Official Level-in Mizoram-ah inbiak leh tum a ni,” a ti a, a hun leh ni erawh ruat a la nih loh thu a sawi a. Ramri buai chingfel tur hian inbiak bakah, lehkha hmangin document indil tawn leh inpek tawna hmalak reng a ni a. Hemi atan hian Study Team din a ni a, anni hian India ram hmun hrang hrang atangin Mizoram tanhmun ti chak turin document-te lakhawmin hma an la reng tih a sawi bawk.

Hei bakah hian Mizoram leh Assam ramri-a Mizoram sawrkarin kawng a laihte a tul dan a zirin hman leh enkawl zui zel an ni tih pawh Home Minister chuan tarlangin, State pahnih te'n Joint Statement fel tak neiin, Status quo leh Joint Statement kalhtu-a tan a rem loh avangin enkawl leh hman zui remchang lo te pawh a awm a. Mizoram sawrkarin Mizoram leh Assam Ramri-a a pawm chu Agust 20, 1875 notification 'Inner Line on the Southern Frontier of District of Cachar' in a tarlan chin a nih thu pawh a sawi bawk.

ZPM Member VL. Zaithanzama zawhna ziaka chhangin Home Minister K. Sapdanga chuan, India leh Myanmar ramri hung chu sawrkar laipui thuneihna a nih thu tarlangin, “Hmalak mek a ni,” a ti a. Ramri hung hi sawrkar laipui thuneihna a nih angin ramri hungna tur hian State sawrkar, Border Guarding Force (Assam Rifles) leh Border Road Organisation-te nen inrawntlangin, kalpui dan turah hmalak mek a ni.

Home Minister chuan August 11, 2025 thleng khan Myanmar atanga rawn raltlan Mizo-ram-ah mi 29.046 an awm a. Raltlan chhinchhiah hna chu District tin te'n thawk tan tawhin zawhfel hun tur erawh sawi theih ala ni lo thung.