ZMC&H in NQAS Certified Hospital an nih lawmna nei

Zoram Medical College & Hospital-in NQAS Certified Hospital an nih lawmna chu nimin khan neiin Health Minister Lalrinpuii chuan a hmanpui a, MUHCS hnuaia thuam thar, Private Cabin leh ICU khum dah belh te a hawng nghal bawk.

Nimin-a he hun hman ah hian Health Minister chuan NQAS certification an neih theih nan Internal Performance Agreement (IPA) chu ngawrh taka kalpui a nih thu sawiin, “National Quality Assessment Standards (NQAS), Ministry of Health and Family Welfare hnuaia MHSSP hmalaknaa Mizoram Damdawi In hrang hrang 42 lai mai in National Certification in lo dawng thei ta leh chung zinga ZMC&H in a sang ber, Platinum Category-ah in han certify tel thei hi a ropui ka ti tak zet zet a ni,” a ti a. “Endikna hautak leh duhtui em em, hmanrua leh thawktu duh hnem leh duhtui em em karah tling nimai lovin, a tehna-a a sang berah in han in hlang thei hi a lawmawm zual hle a ni,” a ti bawk.

Health Minister chuan Sawrkar hmalaknaah MUHCS tan chhoh anih atangin ZMC&H chu damlo tam ber lo dawngsawngtu an nih angin leh Sawrkar hmalakna tih puitlin a nih theihna kawnga sulsutu pawimawh tak te zinga mi an nih avangin mimal tak pawha a lawmthu a sawi bawk a. ZMC&H-a Private Cabin, Ward leh ICU khum te, Department thar hawn belh te pawh mipui tan tangkai taka hman a nih zel theih nan te leh phai lam damdawi In hautak taka pan ngai lova Quality Treatment an lo pek thin te chu a ropui in MUHCS tihlawhtlingtu ber pakhat anih thu a sawi a, chhawm nung zel turin thawktute a fuih bawk a ni.

India ram Damdawi In tha (Quality) bik, tehfung hautak tak tak leh endikna point chi hrang hrang points 5000 chuang hmanga a endiktu mi thiam bik ten an endik thin, National Quality Assurance Standards (NQAS) Assessment hi ZMC&H hian kumin March thla khan an hmachhawn a, mark 92.89% hmuin NQAS Certified Hospital-ah puan an ni a. A Hospital pum anga he lawmman hi dawng an nih bakah Nau neihna lama Hospital tha bik (LAQSHYA) Certificate pawh dawngin, Nau neihna Ward Labor Room chuan 92.88% a hmu a, nau neih zaina room, Maternity OT chuan 98.26% a hmu bawk. Naupang leh naute enkawlna kawngah Damdawi In tha bik tehna (MUSQAN) Certificate pawh dawngin 92.80% a hmu bawk a. Heti hian ZMC&H chu endikna result-a a sang ber Platinum Category-ah a tling vek a ni.

MUCHS hnuaia Minister in ZMC&H-a a hawn tharte hi Private Cabin 30 niin, a hmaa awmsa Room 10 nen tunah hian Private Cabin 40 a awm ta a. ICU khum 13 dah thar chu a hawng tel bawkin Ward hrang hrangah khum engemaw zat dah belh a ni bawk.