MBOCWWB Member te tan Skill Development kalpui tum a nih thu Minister in a sawi

Labour, Employment, Skill Development & Entrepreneurship (LESDE) Department changtu Minister Lalnghinglova Hmar chuan MBOCWWB Member te tan Skill Development kalpui tum a nih thu a sawi.

LESDE Department leh Excise & Narcotics Department changtu Minister Lalnghinglova Hmar hian nimin khan Aizawl Phunchawng-a Operation Kingdom Ministry (OKM) Home chu tlawhin thalai hna thawk rual engemawzat, ruihhlo vanga inkhungkhawm a ngai chu pawi a tih thu a sawi a. “Chutih rualin Home-a lutte hi in hneh loh hria a, in nihna zahpui lova huaisen taka lut in ni a. Huaisen takin a bul in tan ta sa sa, hlawhtling turin a tawp thleng ngei ang che u.” tiin a fuih a. Excise & Narcotics Department in ruihhlo do kawngah nasa takin hma a la mek tih a tarlang bawk. Minister huan OKM Home-a thawktu leh ‘zirlai’ te chu Home-a an awm chhungin Insak leh a kaihhnawih ah an thawk thin tih pawh sawiin, hei vang hian LESDE Department in Home hrang hranga Mizoram Building & Other Construction Workers Welfare Board (MBOCWWB) registration campaign a neih hunah member ni tura inziaklut theuh turin a chah a. MBOCWWB Member te tan Skill Development kalpui tum a nih thu leh OKM Home-a member te pawh an tel theih tur thu a sawi a ni.

Minister hian Sawrkarin thalaite hmakhua a ngaihtuah thu sawiin, Department hrang hrang, a bikin Skill Development kaihhnawihah thawhho dan ngaihtuah zel a nih tur thu a sawi a. OKM Home-a awmte hian hna thawh nan Cement mixer a pek bakah Sports bungrua leh pawisafai Rs. 30,000/- a hlan bawk a ni.

He hunah hian OKM Home Founder Lalruatpuii chuan an Home inrelbawl dan tlangpui tarlangin, tun dinhmunah mi 430 an awm mek thu leh Tuikhuahtlang Presbyterian hmeichhia in kumin March atangin thla khatah Rs. 5000 an pek leh Vaivakawn chawhmeh zuarte’n Inrinni ah chawhmeh an pek thin bak chu rinna in an kal tih a sawi a. OKM Home-ah hian luh man leh awm man awm lovin Home-a ut thar tan thla sarih (7) Course siam a ni a, Course zawh hnuah a duh tan rawngbawltu ah a inpek theih a. Lut nawn tan thla 9 - 11 Course siam a ni bawk.

Nimin-a Minister in OKM Home a tlawhna hun hi OKM Adviser Rev. K. Lalpiangthara chuan kaihruaiin Minister hi LESDE Director John Tanpuia, Excise Commissioner Z. Lalhmangaiha leh Department Officer dangte’n an tawiawm a ni.