India ramah National Space Day hman a ni

Inrinni kalta, August 23, 2025 kha kum 2023-a India ramin Thla leilung-a Chandrayan 3 hlawhtling taka a tum tirna champha puala sawrkarin ni pawimawh a puan, National Space Day a ni a, India ram pumah kawng hrang hranga hman a ni.

Mizoram Remote Sensing Application Centre (MIRSAC) Sr. Scientist ZD. Laltanpuia chuan National Space Day chu nikum, 2024 atang khan August ni 23-a hman a nih thu leh kumin ah pawh a lawmna pui ber New Delhi-ah hman a nih thu sawiin, ramchhung hmun hrang hrang ah pawh hman a nih thu a sawi a. Mizoram-ah chuan North Eastern Space Applications Centre (NESAC), Shillong kaihhruaina hnuaiah tun thla tir lam khan Indian Space Research Organisation (ISRO) leh MIRSAC te nen Champhai-ah School leh College naupangte nen hman a nih thu a sawi a. Quiz intihsiakna bakah Lecture ngaihnawm tak tak te ngaihthlak a nih thu sawiin, Quiz-a pakhatna, Hmunhmeltha High School zirlaite chu Shillong-a NESAC-ah hruai an nih thu a sawi bawk.

Kumin-a National Space Day-ah hian thupui atan ‘Aryabhatta to Gaganyaan: Ancient Wisdom to Infinite Possibilities’ tih hman a ni a. National Space Day pual hian Group Captain Subhanshu Shukla chuan New Delhi-a Nehru Planetarium ah Aryabhatta Gallery a hawng a ni.