UGO Electric Billing System Software tlangzarh

Mizoram pumah a vawikhatna atan Electric Billing System chi khat, UGO Electric Billing Software thar chu hman tan niin nimin khan a tlangzarhna hun hman a ni a. P&E Minister F. Rodingliana chuan he Software thar hi a tlangzarh a ni.

Nimin-a Minister in a tlangzarh tak UGO Electric Billing System Software hi Mizoram pumah tun thla tir August ni 1 atang khan hman tan a ni a, He billing System thar hi Inventive Solution kutchhuak niin March thla khan Pilot Project atan Rural Sub-Division leh Distribution Sub-Division-III ah te hman chhin a ni a, May 2025 atang khan Mizoram-a District Headquarters hrang hrangah hman tan niin August ni 1, 2025 atang khan Mizoram pumah hman tan a ni leh a. Tun hi Billing SoftwareS system chi khat Mizoram puma hman vawikhatna a ni a. He Billing System hi Cloud base niin Mobile android leh IOS application hmangin Mizoram khawi hmun atang pawhin online hmanga bill pek theih a ni ta a ni.

UGO Electric Billing Software thar tlangzarhtu P&E Minister F. Rodingliana chuan tunlai IT thiamna hmang tangkaia Billing Software thar, a hma mi aia tha zawk leh mipui/consumer te tan pawha hriatthiam awlsam zawk hman tan a ni ta chu lawmawm a tih thu a sawi a, a vawikhat nan a Mizoram puma Billing Software thuhmun hman a ni ta chu hmasawnna lawmawm tak a nih thu a sawi. Minister chuan P&E hnuaia thawktu kalkhawmte chu mipui tana thawk an nih anga inpekna thuk zawk nena inhawng taka mahni awmhmun theuhah mipuite tana thawk turin a chah a. Central Scheme hrang hrang tam zawk hailut turin Central Scheme-te zirchianga Mizoram in kan chhawr tangkai theih tur dap a, chumi mil a project proposal tam zawk siam turin Department Engineer kalkhawmte chu a chah bawk a ni. Mizoram hmun hrang hranga kan harsatna lian ber Transformer indaihlohna te phuhruk turin Transformer thar leina tur budget-ah pawisa dah belh a nih thu tarlangin, tunah pawh Transformer thar 60 dang lei belh leh tura buaipui mek a nih thu a sawi bawk.

He hunah hian P&E Secretary K. Lalrinzuali pawhin eng chu kan nunphung engkim nena inzawm tlat a nih tawh avangin a tel lovin kan awm thei tawh lova, chuvangin Power Supply tha mipuite an pek theihnan tan la lehzual turin Department Officer kalkhawmte a chah bawk a ni.

Tun dinhmunah Mizoram pumah Electric Consumer 3,10,130 awmin heng zinga Consumer 2,01,843 ten August 2025 bill an pe tawh a, bill dawn tawh zawng zawng zat hi cheng vbc. 17.73 niin online payment a bill dawn zat hi cheng vbc. 9.92 a nih laiin, Counter a bill dawn zat chu cheng vbc. 7.81 a ni a. Online (PEDM apps) hmanga bill pek uar turin Department chuan Consumer/mipuite a ngen nghal a ni.