Ni hnih chhung awh Mizoram Assembly Fur thutkhawm tluang taka zawhfel a ni

Ni hnih (2) chhung awh Mizoram Legislative Assembly Fur thutkhawm chu nimin tlai khan tluang taka zawhfel a ni.

August 27 leh 28 chhunga neih Mizoram Legislative Assembly 9-na thutkhawm vawi 5-na hi nimin chawhnu khan zawhfel niin Speaker Lalbiakzama chuan Session chhunga tihtur an ruahman anga tluang taka an kal theih thu sawiin, Pathian hnenah lawmthu a sawi a. Session chhunga Member ten thahnem ngai taka kan ram leh hnam tana tha leh zung, rilru leh ngaihtuahna te hmanga an thawhhona chuan rah duhawm tak a chhuah ngei a beisei thu a sawi a. Session hlawhtlinna atana thawktu Department hrang hrangte chungah lawmthu a sawi bawk.

Thutkhawm tihtawp a nih hma hian Speaker chuan tun tum Session-a an hnathawh tlangpui tarlangin, ram hruaitu boral mi pahnih te sunna hun hman a nih thu te; zawhna House chhunga chhan chi (Starred Question) 350 lut ah 342 admit 3 te chu hnawlin 6 erawh chu hnuhlet a nih thu a sawi a, List of Business-ah 40 dahin House-ah 5 chhan hman a nih thu a sawi. Un-Starred Question lut 105 awmin 97 te chu admit a nih thu leh 7 chu hnawlin pakhat chu hnuhlet a ni tih pawh a sawi a. House-ah Report 19 present in Paper 13 lay a nih thu a sawi a. Official Resolution lut pakhat chu pawm a nih bakah Government Bill lut pali (4) te chu pawm vek a nih thu a sawi bawk.