NCORD thutkhawm ah ruihhlo do dan tur ngaihtuah

Serchhip District NCORD thutkhawm vawi 17-na chu nimin khan neih niin Ruihhlo do kawnga hmalakna hrang hrangte thlirho a ni.
Serchhip DC Meeting Hall-a NCORD thutkhawm hi District Bawrhsap Paul L. Khuma chuan kaihruaiin ruihhlo dona kawnga thawktu hrang hrang ten an hmalakna te an tarlang a, Serchhip SP Gavit Gogna chuan Meeting hnuhnung bera thurel bawhzuia Police ten Awareness Campaign an neih thu leh Meeting inkarah ruhhlo man an neih loh thu a sawi a. Assam Rifle te nen ramri dep khuaah Joint Patrolling tum hnih an neih thu a sawi bawk. Ser-chhip-a Excise & Narcotics Department chuan tun tuma thutkhawm leh a hma chiaha thutkhawm inkar ah ruihhlo kaihhnawih ah thubuai ziahluh pahnih an neih thu sawiin, mi pahnih man an neih thu an sawi bawk a. Hei bakah hian Department hrang hrang ten an huamchhung theuha ruihhlo dona kawnga an hmalakna te an tarlang bawk a ni.

He thutkhawm a tel te hian ruihhlo dona kawnga thawhho dan tha zawk leh hlawk zawk a awm theih dan tur sawihoin, thu pawimawh inhrilh tawn te, a huho-a thawhchhuah leh tanrual dan turte an sawiho bawk a. Serchhip District chhungah tunhnaiah ruihhlo a van thu leh hmundang atanga rawn lut a tlem thu Member te hian an sawi bawk.

He thutkhawm kaihruaitu Bawrhsap Paul L. Khuma chuan member tel te chu ruihhlo dona kawngah tha thlah lo tur leh tangrual tura ngenin, ruihhlo ti thinte pawh fel taka chhinchhiah a, vil zui tur leh khawi atanga ruihhlo chu lo kal nge tih te pawh uluk taka chhui zui turin a hrilh a ni.