Mizoram-a Cocoa plantation-ah theihtawp chhuahpui tum thu sawi

Central Plantation Crop Research Institute (CPCRI), Guwahati -a Scientist te chuan Mizoram-ah Cocoa Plantation kalpui a nih dawn chuan theihtawp chhuaha puih an inhuam thu an sawi.

Agriculture & Farmers' Welfare Minister PC. Vanlalruata chuan nimin khan Guwahati-a Central Plantation Crop Research Institute (CPCRI) chu tlawhin Principal Scientist Dr. Alpana Das leh a thawhpuite nen an inkawm a, CPCRI hi Cocoa Research Centre niin Grafted Seedlings siamna a ni bawk a. Scientist te hian Cocoa chungchang chu Powerpoint Presentation hmangin Minister hi an lo hrilhfiah bakah Field-a an hmalakna te an tlawhpui a ni. He inkawmna ah hian Scientist te chuan kum 35 kalta atang khan Cocoa zirchianna an lo kalpui tawh thu sawiin, a Seedlings tha thawnchhuah chungchangah Meghalaya leh Arunachal Pradesh sawrkar te nen MoU an ziah tur thu an sawi a, Mizoram sawrkar nena thawhhopui ah Agriculture Minister chu sawm nghalin, Mizoram-ah Cocoa Plantation kalpui a nih dawn chuan theihtawp chhuaha puih an inhuam thu leh Grafted Seedlings pawh Pilot Project atan engemaw zat pek an intiam bawk a ni.

CPCRI Scientist te chuan Cocoa chi hrang hrang an lo zirchianna atangin NE bik tana Cocoa chin tur variety tha bik an hmuchhuah thu Minister hi an lo hrilh bawk a, zirchianna nei hmasa lova farmer ten an hmuh ang ang an ching thin hian a nih tur ang an tharchhuah loh phah nasa thin hle tih an sawi bawk.