Kutdawh khapna siamna tur Bill pawm a ni

Mizoram Legislative Assembly chuan kutdawh khapna Dan siamna tur, Mizoram Prohibition of Beggary Bill chu nimin khan an pawm.

He Bill puluttu Social Welfare Minister Lalrinpuii chuan Mizoram Prohibition of Beggary Bill chu Karnataka Beggary Act 1975 entawnin, Mizoram milin an herrem tih a sawi a, Social Welfare Department in Survey an neihah kutdawh thin mi 30 chuang an avangin Mizoram Prohibition of Beggary Bill chu Dan-ah a chan ngei theih nan a pulut tih a sawi. Minister chuan an Bill putluhah chuan Local Relief Board-ah a tul angin NGO leh Kohhran te member an nih theih thu te, kutdawh te chu Receiving Centre-ah dah phawt an ni anga, darkar 24 chhungin an chhungte hnenah emaw, an lo kalna State-ah dahkir dan tur ngaihtuah an ni dawn a, hawna tur nei lo te chu Relief Centre-ah dah an ni dawn a, hetah hian anmahni enkawl dan tur ngaihtuah a ni dawn tih te a sawi a ni.

He Bill sawihona ah hian Eptu MLA ten kutdawh khapna dan siam chu thil tul-ah an ngaih loh thu an sawi a. Oppostion Leader Lalchhandama Ralte chuan Mizoram thlirin he bill hi House-a pharh a hun a la tih loh thu a sawi a, kutdawh awm lo se tih an duh rualin, kutdawh awm lo turin mipuite changkang thei se an duh thu a sawi a, he Bill hian Zo-inspiration leh Media hrang hrang kaltlanga mi harsa zawkte tana tanpuina khawn te, Krismas leh Kumthar inkara vantlang hmuna pawl leh mimal ten zai hmanga tanpuina an khawn thin te pawh khap tel niin a sawi.

BJP MLA Dr. K. Beichhua chuan Mizoram chu Kristian State a nih angin kutdawh khap lova kutdawh tih rem dan tur kawng a awm zawk a rin thu a sawi a, he Bill hian pianphunga rualbanlote a huam dawn avangin chung mite chu dan bawhchhetute ah chhiar an ni dawn nia a hriat thu sawiin, mi chhumchhiate rahbehna ang a tih thu a sawi bawk.

Bill sawihona ah hian Congress MLA C. Ngunlianchunga pawhin Rel lo lut tur avanga kutdawh an lo lut teuh tur anga ngaih chu thil dik nia a hriat loh thu a sawi a, ILP tel lo chuan tumah Mizoram-ah an lut thei lova, sawrkar chuan chuti lam chu khauh zawkin kalpui se a tih thu a sawi a. Kohhran Upa a nih ang pawhin kutdawh khapna Bill chu a thlawp thei lo tih sawiin, kutdawhte chu pianphunga rualbanlote an ni a, an duh avanga kutdawh an ni bik lo tih sawiin, Pathian Lalram din tum sawrkar tan chuan an Bill putluh chu inrem loh a tih thu a sawi bawk.

House Leader Lalduhoma chuan he Bill sawihona ah hian Mizoram Prohibiton of Beggary Bill ah chuan mi harsa zawkte tanpuina tur khawn (charity) khapna a lo awm a nih chuan an dan duan chu ennawn a siamthat tul a tih thu a sawi a, he dan hi social Activist te pawn siam tura an ngen ngawih ngawih thu a sawi ve bawk a ni.