Sept. 20-ah Bana kaih dil leh tan theih beisei a ni

Mizoram sawrkar in Bana kaih a kalpui mek chu thla thar September 20 atang khian dilna thehluh theih beisei a ni.

Nimin khan Chief Minister Lal-duhoma hovin Mizoram State Policy Coordination Committee chu CM Conference Hall-ah an thukhawm a, he huna tarlan a nih danin Bana Kaih Pilot phase Loan component-ah khan dilna 11,439 a lut a, pawmsak (approved), loan pek theih 668 niin endik leh deuh ngai 62 an la awm a. Chuvang chuan pilot phase a dawng tur zat hi a la danglam thei a. A diltute DPR siamsak tur MKVIB a thawn mek 58 a awm bawk a ni. Adviser to CM Dr. KC. Lalmalsawmzauva chuan Phase 2 atana inbuat-saihna tlangpui a sawifiah a. Bana Kaih Loan Component Software thar duan a ni a. A diltu in software-in a mamawh data-te a dahluh kim chuan software khan DPR a rawn siam chhuak (generate) thei a. DPR siam leh endikna lama hun rei tak hman ngai thin a titawi hle tawh tura ngaih a ni. An dil tur trade a zirin application form hrang chi 5 siam a ni tawh anga, MKVIB chu Line Department pakhat anga kaltir ve tawh tur a ni ang.

Chief Minister's Special Package hi chu a diltuin Online-in a submit thei anga, Common Service Centre (CSC) atang pawhin a thehluh theih anga, Hard copy pawha thehluh theih a ni ang. A dilna hi DC Office-ah chauh ni lovin BDO Office-ah pawh thehluh theih tura ruahman a ni a. Chhungkaw khat atanga pakhat aia tamin an dil loh nan ruahmanna siam a ni.

Second Phase atanga a dilna portal thar kalpui a nih dawn avang leh a dilna form pawh a danglam dawn tak avangin a diltuten a thara dil vek tur a ni a, September ni 20, 2025 atanga dilna hi thehluh tan theih beisei a ni. Dilna hi nghah-khawl a ni tawh dawn lova, a lut apiang endik nghal zel tawh tur a ni.

He hunah hian a endik (monitoring) dan kalphung pawh siam that a ni a, Awareness Campaign zau taka kalpui tur a ni bawk ang.