Kolasib-ah District Level Security thutkhawm nei

Nimin khan Kolasib-ah District Level Security Meeting chu Bawrhsap, Robert C. Lal-hmangaiha hova neih a ni.

Kolasib DC Office Conference Hall-a thutkhawm ah hian Bawrhsap chuan Kolasib District chu State luhka leh ramri depa awm a nih avangin dan leh thupek kawngah inven lawk a ngaihna hrang hrang a awm thu a sawi a. Thenawm State Assam Sawrkar chuan tunhnai ah an ram chhunga dan lova awmte dapchhuah beihpui a thlak avangin Mizoram lama rawn luh tum an awm theih thu leh hei hian Sawrkar dan leh dun kenkawhna kawngah harsatna tam tak a thlen theih thu a sawi a. Hemi avang hian Kolasib District chhunga Inner Line Permit(ILP) Check Post-te uluk zawka kalpui mek a nih thu leh Sawrkar hotute pawhin heng Check Gate-te hi vil in an tlawh thin thu a sawi a. Ramri depa awm khawtlang hruaitute leh mipuite pawh dan lova Mizorama rawn lutte venna kawnga an thawhna chu fakawm tiin Sawrkar hmalakna thlawp zel turin a sawm bawk a ni.

He hunah hian Kolasib District chhuanga Police Duty Post-te leh ILP Check Post hrang hrangte dinhmun tarlan a ni a. Check Post-te inbiak-pawhna leh inkalpawhna tha neih dan tur te, thawmthat a ngaihna laite leh Police Duty Post hmun thenkhat remchang zawkna avanga a hmun sawn ngai laite sawihoin, thawktu indaihlona phuhruk dan tur sawiho a ni a. Ramri depa ILP Check Post hrang hrangte pawh tih changtlun dan tur leh 4-Lane kawngpuiin Mizoram a rawn paltlang huna ILP Check Post leh Police Check Post turte pawh sawiho nghal a ni a. Kolasib District chhunga Rail Station-a ILP Check dan turte, Railway-a Police Duty tur mamawh a nih dante ngaihthlak niin Kolasib District chhunga Security lama chak zawk a hmalak a nih thei nan Police Station leh Check Post siam belh dan turte sawiho a ni bawk.