Aizawl Chawnpui Veng-a ‘PM Ekta Mall’ sakna tur lungphum Chief Minister in a phum

Chief Minister Lalduhoma chuan Inrinni khan Aizawl Chawnpui Veng-a ‘PM Ekta Mall’ sakna tur lungphum a phum a, he Mall hi sak zawh a nih hunah khawvel Market thleng phakin Mizoram kutchhuakte zawrh a ni dawn tih a sawi.

‘PM Ekta Mall’ sakna tur lungphum phumna hunah hian Chief Minister Lalduhoma chuan PM Ekta Mall hi kum 2023-2024 SASCI Part-VI atanga Central Sawrkarin a ruahman a nih thu sawiin, Mizoram tan cheng vbc. 127 ruahman niin tunah hian cheng vbc. 63.5 dawn a ni tawh tih a sawi a, sak zawh a nih hunah chuan Mizo thalai 200 chuang tan hna thar siam thei tura ngaih a nih thu sawiin, Mall satu turin Ministry of Health Family Welfare hnuaia Public Sector Undertaking lar tak, HLL Infra Tech Services (HITES) ruat an nih thu leh a enfiah hna chu IIFCL in Project Management Unit atangin an thawh dawn thu a sawi a, HITES chu an sulhnu a tha hle nia hriat a nih thu pawh sawiin, HITES hotute hnenah hna tha an duh thu leh hun bi tiam chhunga sa zo satliah lo a, tha tak leh quality sang taka sa zo tur bakah Revised Estimate ngai lo tura a hun taka hna zo tura a hrilh tawh thu a sawi bawk.

Chief Minister chuan PM Ekta Mall chu ramchhunga thil siamchhuah phochhuahna hmunpui, International Market thleng phaka tualchhung kutchhuakte zawrhna tur a nih thu pawh sawiin, Mizoram Ekta Mall-ah State hrang hrangin Stall an nei anga, Mizoram pawhin State hrang hrangte Ekta Mall-ah Stall a nei ve bawk dawn tih a sawi a. One District One Products, Geographical Indication Product leh kut themthiamte kutchhuak thehlarna leh zawrhchhuahna hmunpui a nih dawn avangin Mizoram chhunga District tinin PM Ekta Mall-ah hian Stall an neih dawn thu leh State leh UT te dawr tur 36 leh Mizoram District tinte Stall tur 11, a vaiin Stall 47 tal a awm dawn thu a sawi a, Food Court, Restaurant, Children’s Play Area, Gaming Arcade, Meeting Hall, Movie Theatre, Retail Kiosks leh thil dang tam tak a awm dawn thu a sawi bawk.

He hunah hian Tourism Minister Lalnghinglova Hmar pawhin ‘PM Ekta Mall’ tih awmzia chu ‘Inpumkhatna bazarpui’ tihna a nih thu a sawi a. Sumdawnna hmunpui tur, a awmna Veng mai bakah Mizoram tana hmun tangkai tak tur a nih thu a sawi a. Bul lo tantu Tourism Minister hlui Lalrinpuii chunga a lawm thu a sawi bawk a. He hunah hian Commerce & Industries Minister F. Rodingliana, Adviser to CM leh Bialtu MLA TBC. Lalvenchhunga te pawh an tel a ni.