Chief Minister's Rubber Missions in huam zau dawn

Mizoram-a Chief Minister's Rubber Missions 2nd Phase kalpui mek chu Mizoram Rubber Society (MIRSO) ten an dil angin Hectare 173-ah kalpui belh leh a ni dawn.

Nimin khan Chief Minister Lalduhoma chuan a Office-ah Mizoram Rubber Society (MIRSO) hruaitute kawmin MIRSO President Hrangzuala chuan sawrkarin a tirh anga Mamit District chhunga Chief Minister's Rubber Missions 2nd Phase hmanga hmalakna tur khua an tlawh report a pe a. MIRSO Presdient chuan loneituten CMRM hi tha an ti em em tih sawiin, an phurin an nghakhlel tih a sawi a. “He hmalakna hmanga bul tan ve ngei duh an tam si a. 2nd Phase atana Hectare min pek belh 400 Ha. ah hian kan inkhung leng ngang lova, a dang 173 Ha. min pek belh leh mai turin kan rawn dil che a ni,” tiin CM hnenah hian an ngenna a thlen a. CM Rubber Missions hmalakna tinrengah rubber chingtute an teltir ve zel avanga lawmthu sawiin, “Langtlang takin sawrkar a kal a, khaw tinte hian tihhlawhtlin kan tum em em vek a ni,” a ti bawk.

Chief Minister Lalduhoma chuan Chief Minister's Rubber Missions 2nd Phase atana an dil belh Hectare 173 hi pek belh a remti a. A mawhphurtu Official pawimawhte pawh a hriattir nghal a. Hei bakah hian Rubber sawngbawlna khawl za (100), subsidy a pek chhuah tur pawh chak taka bawhzui a nih thu a lo hrilh a ni.

CM Rubber Missions 2nd Phase-ah hian ram hectare 2400 a zau-ah hmalak tur a ni a. A zatve Hectare 1200 chu NABARD sum hmanga kalpui a, a zatve dang hi Handholding Scheme atanga kalpui tum a ni thung a. Nimin-a MIRSO dilna anga ram hectare 173 dah belh leh te hi Handholding Scheme hnuaia kalpui tur a nih avangin Handholding hian 2nd Phase-ah hectares 1373 a zau a huam dawn ta a ni.