House-ah Report te pharh

Mizoram Legislative Assembly Session nimin-a neih ah Subject Committee-II Chairman Lalchhuanthanga MLA chuan First Report of Subject Committee-II chu House-ah a pharh.

He report hi ITI High School, Aizawl sak mek, sak zawh theih loha awm chungchang a ni a. He buiding hi SEDP (2023-2024) sum hmanga sak niin Rs. 27,75,815 chu pekchhuah a nih hnuah kum 2023-2024 kum tawpah a la bang Rs. 36,74,185 chu surrender a ni a. Finance Department atanga re-validation tih beisei a nih laiin sum harsatna avangin pekchhuah theih lohin a awm ta reng a, hna thawh lai pawh chhunzawm lohin engemaw chen a awm ta a ni. Committee-in a zirchian lai hian hemi atana sum la mamawh hi dil mek niin hmuh theih an beisei hnai niin Department lam chuan an sawi a. Committee chuan an zirchian hnuah a rang thei ang bera he building hi sak zawh ni se tha an ti a, sum tul angte pawh a rang thei ang bera pekchhuah nise tiin rawtna (recommendation) an siam a ni.

Nimin-a thutkhawm ah hian 2nd Report of the Committee on Papers Laid on the Table chu an Chairman Chairman Lt. Col. Clement Lal-hmingthanga MLA chuan a pharh bawk a. Committee on Papers Laid on the Table Chairman hian Sawrkar department te leh sawrkar endika, enpui leh hriatpuina hi Mizoram Legislative Assembly Session chhung chauh hian kalpui hman a ni loh thu te, chumi atan chuan Assembly-in Rules of Procedure and Conduct of Business hmangin Committee hrang hrangte chu Session lai leh Session loh laia thukhawm thei tura mawhphurna a hlan tih sawiin. India danpui te, dan siam te leh a dang dangina dan anga House-a report rawn lay tur lay a nih leh nih loh zir chiang tur Committee a nih thu a sawi a. Sawrkar Company (PSU)-ten hun rei tak chhung he Assembly-ah hian report an rawn thehlut lo tih hmuh a nih thu te a sawi bawk a ni.