BSF lak tur chungchang ah ngaihdan inang lo nei

Mizoram Pradesh Youth Congress Committee (MPYCC) chuan BSF lak chungchangah Chief Minister Lalduhoma chu dawt sawi ah an puh a. Hetihlai hian ZPM Thalaite chuan Special Recruitment hmanga Mizo thalaite tana BSF Constable (GD) 300 lakna tur Advertisement tihchhuah a ni chu lawmawm an tih thu an sawi thung.

Nimin-a Aizawl Press Club-a thuthar thehdahtute an kawmnaah MPYCC Senior Vice President Ngurdingpuia Pachuau chuan Chief Minister Lalduhoma'n, “Union Home Minister Pu Amit Shah hnena an dil angin Mizo thalai 300, Border Security Force (BSF) a lakna tur Advertisement chu Vawiin khan tihchhuah a ni ta a. Mizo mipa 255 leh hmeichhia 45 lak an ni ang,” tia August ni 2025-a a Facebook wall-a a post chu thudik lo hulhual a nih thu a sawi a. Kum 2023 khan Ministry of Home Affairs chuan India ram pumpui tan BSF Constable 3588 lak phalna a pe a, kum 2024 April thla ah Parliament (Lok Sabha) Inthlanpui neih a nih vangin hmalak chhunzawm mai theih a ni lo a, chumi chhunzawmna chu tuna BSF hnaruak hnawhkhah mek hi a nih thu a sawi a, Mizoram bik BSF 300 lakna tur pawh chumi tho chu a nih thu a sawi a ni.

MPYCC chuan Social Media kaltlanga thu post dangah India Sipai Agniveer lakna kalpui mek chu MLA Lt. Col Clement Lalhmingthanga’n a vil reng bakah Sports Minister Lalnghinglova Hmar thahnemngaihna zarah Sport Quota atangin mi 12 an tlin thu a tarlan pawh Politics tenawm tak a ni tih sawiin, hna lak chungchang tihbawrhbanna leh mipui rilru hruai-sual tumnaah an ngai tih an sawi bawk.

Hetihlai hian ZPM Thalaite chuan Chief Minister Lalduhoma’n Union Home Minister Amit Shah hnena ngenna a siam angin, Special Recruitment hmanga Mizo thalaite tan a BSF Constable (GD) 300 lakna tur Advertisement chu tihchhuah a lo ni ta tih thuchhuah siama tarlangin, MHA in kum 2023-a Central Armed Police Force Constable hna lak dan, Revised Scheme a siamah North East-a State hrang hrangin Reserved Vacancies an neih theih dan tarlangin, heng quota hnawhkhah loh te hi Special Recruitment hmanga hnawhkhah theih a ni a, he Dan hi thiam takin Chief Minister Lalduhoma chuan hmang tangkaiin, Mizoram-in kan quota la hnawhkhah lohte hnawhkhat turin Union Home Minister hnenah ngenna a siam niin an sawi a, a hmalknate a hlawhtling ta chui lawmawm an tih bakah Mizoram-a thalaite hna tur Chief Minister-in theihtawp chhuaha a ngaihtuah thin chu fak a phu an tih thu an sawi. ZPM Thalaite chuan Mizo Territorial Army : Home and Heart din tur chungchang ah Mizo Territorial Army hi Mizoram leilung fate chanpual tur niin, November 2025-ah post 70 lak a ni dawn tih an sawi bawk.