PM Vishwakarma-a inziaklut te Bawrhsap in a fuih

Serchhip District Bawrhsap Paul L. Khuma chuan PM Vishwakarma chu tangkai taka hmang turin portal-a inziaklut te chu training paltlang ngei turin a fuih.
Serchhip District-a PM Vishwakarma kalpui dan chungchang sawihoin nimin khan Ser-chhip DC Meeting Hall-ah District Level Committee chu an Chairman leh Bawrhsap Paul L. Khuma hovin an thukhawm a, Bawrhsap chuan Serchhip District-ah tha taka PM Vishwakarma kalpui mek a nih chu lawmawm a tih thu a sawi rualin a hun takah report thehluh a tul thu te, harsatna awm apiang te hriattir a bawhzui dan tur ruahmanna tha zawk zawn zel a tul thu te a sawi a. He Central Sector Scheme hi Serchhip District chhunga kutthemthiam ten eizawnna puitling an neih theih nana thil tangkai tak a ni tih hria a, portal-a inziaklut tawh te chuan training paltlang ngei turin a fuih a ni.

PM Vishwakarma hi kutthemthiamna lama eizawn tumte tana sawrkar laipui ruahmanna a ni a. Commerce & Industries, Labour Employment Skill Development & Entrepreneurship Department te leh Bank te thawhhonain a thlawna training buatsaih thin a nih bakah training a tel te hnenah stipend pek an ni a, loan puk duh te tan dahkham ngai lo leh pung hniam taka pek thin an ni bawk.

Nimin-a thutkhawm ah hian Serchhip District dinhmun tlangpui ngaihthlak niin training tha taka kalpui mek a nih thu tarlan a ni a. Chutihlaiin, sawrkar portal-a inziaklut tawh si, training a kal duh leh ta lo engemawzat an awm thu ngaihthlak a ni a. Hei bakah hian Bank atanga loan puk kawngah training chhuak thenkhat ten harsatna an tawh dan ngaihthlak a ni bawk a. Heng harsatna te sutkian dan tur sawiho a ni bawk.

PM Vishwakarma hnuaiah hian State pumah dilna 10,740 dawn ni tawhin Serchhip, Lunglei leh Khawzawl District te chu Mizoram a registration nei tha zual te an ni.