Cancer vei inenkawl mekte tana chenna tur ‘Apna Ghar’ in chhawr tangkai a hlawh

Aizawl Zemabawk Veng-a Cancer Hospital-a inenkawl mek te Aizawl khawpui pawn km 20 piah lam mi te tana a thlawn veka awmna tur India rama damdawi siamchhuaktu lian tak INTAS Foundation-in a din ‘Apna ghar’ chu damlo te'n an hmang tangkai hle.

Zemabawk Apna Ghar-ah hian pindan 8, mimal riahna pindan 2, mi pahnih awm theihna pindan 5 leh mi pathum awm theihna pindan pakhat a awm a. Damlo pakhat hian awmpui pakhat theuh an nei a. He In-ah hian pindan, mut puan leh ei leh in pek vek an nih bakah damlo leh awmpuite tan Wifi connection pek an ni a. TV bakah lehkhabu chhiar tur an dah bawk a. Thla khat chhungin vawi li activity neiin an inhmukhawm thin a, damlo te leh awmpuite tana tangkai tur inhrilhna leh inkawmhona hun hman thin a ni.

Apna Ghar-ah hian a hotu ber Project Assistant hovin Counsellor 2, venghimtu 3, Inchhung vawngtu leh chawchhum 2, an vaiin mi 8 an awm a. Hetianga Cancer veite tana engkim a thlawn veka awm theihna INTAS Foundation kaltlanga Mizoram in a neih hi Aizawl khaw pawn lam, District hrang hrang miten an hlutin Room pawh a khat hneh hle a ni. 

INTAS Foundation hian India ram khawpui lian deuh deuha Cancer Hospital awmna bulah ‘Apna Ghar’ (Kan In) hi an CSR hmangin hmun 41-ah an din a. Ram bung hrang hranga thenin hmarchhak pumpui hi Kolkata atangin enkawl a. Mizoram leh hmun thenkhat hi Guwahati atanga enkawl a ni thung a, India ram pumpui INTAS Foundation hi Gujarat-ah hmunpui neiin an awm a ni.