H&TE Department hmalakna thlirletna neih a ni

Higher & Technical Education Department hnathawh thlirletna hun chu nimin khan Minister Dr. Vanlalthlana hovin neih a ni.

Taxation Department Auditorium-a he Review Meeting-ah hian Dr. Vanlalthlana chuan Department hnathawh thlirletna hun chuan selna tarlan emaw, a thawktute tihsual sawichhuah ngawr ngawr emaw a kawk lovin, a tum ber chu a thawktute kalkhawmin an hnawthawh te in hriatpui tawnin, an harsatna tawh te ngaihthlaka, chungte chu engtin nge awlsam zawkin an sutkian thei ang tih ngaihtuah leh kawng dap te a nih thu a sawi a. Mizoram Sawrkar chuan College zirna leh zirna sang zawk chu a ngaih-pawimawh thu sawiin, tun kum hnih kalta khan Central leh State sum cheng vbc. 100 bawr vel chu College a zirna tihchangtlun nana hman tawh leh ruahman a nih thu a sawi bawk.

Mizoram Polytechnic Lunglei chungchang sawiin H&TE Minister chuan, a ram chungchanga harsatna te sukiang turin Sawrkarin theihtawp chhuahin hma a zel a, hmasawnna te pawh an hmu chho mek a, changtlung taka a awm theih hma an la zel dawn tih a sawi a. Mizoram Engineering College, Pukpui chungchang pawh sawilangin Minister chuan, Academic Session chu nakum a tan beisei a nih thu leh hemi atan hmalakna hrang hrang te chu a kal chho mek tih a sawi a. State University pawh Sawrkarin a tul tul a buaipui chho mek a, tuna College hrang hranga zirna peng awmsa te bakah Post-Graduate Subject zirna kan neih sa te hmang tangkaiin Cluster Approach angin kalpui phawt tum a nih thu a sawi bawk.

H&TE Department hmalakna thlirletna hun hi hun hmasa lamah Higher & Technical Department changtu Commissioner & Secretary H. Lalengmawia chuan kaihruaiin chawhnu lamah Addl. Secretary R. Lalmuankimi chuan a kaihruai a, sawihona hun huamzau taka neih a ni bawk.