Mizoram-ah Online Games lama inbumna a hluar zel

Mizoram-ah Online Games lama inbumna a hluar chho hle a, heng zingah hian Mobile Legends leh PUBG-ah te inbumna a tam zual tih Mizoram Cyber Crime Police ten an sawi.

Akashvani Aizawl zawhna chhangin Mizoram Cyber Crime Police hotute chuan Online Games hmanga inbumna thubuai chu kum 2023 atang khan Mizoram-ah awm chho ttnin, kum 2024-ah chuan a hluar chho tawh hle an ti a, nitin thubuai lut ziah ang a nih thu an sawi a, Mobile Games zingah Mobile Legends leh PUBG te chu inbumna tam zualna a ni tih sawiin, an inbum dan tlangpui chu PUBG leh Mobile Legends account hralh leh in leisak chungchang ah niin Mizo leh Mizo bakah khawvel ram hrang hrang atang pawhin a awm thin an ti a, Mizo leh Mizo inbumte chu an chhuichhuak thei mai a, ramdang atanga bum tawk te chu chhuichhuah sak a har tawh thin tih an sawi a ni. 

Cyber Crime Police te chuan tunhnaiah naupang zinga Online Games khel thin te chuan an Games tih thatna atan an nu leh pa, pi leh pu te hriatpui lovin an Gpay leh Bank Account hmangin pawisa tam tak lo hman sak thin an awm thu sawiin, hetiang kawngah hian nu leh pa te fimkhur a tul thu an sawi bawk.

August ni 21 khan Parliament In hnih chuan ‘The Promotion and Regulation of Online Gaming Bill 2025’ an pass a, President Droupadi Murmu chuan he Bill hi a pawmpui zui nghal a ni.