World Photography Day 2025 pualin Serchhip leh hmun hrang hrangah hun hman a ni

Nimin August 19, 2025 kha ‘World Photography Day 2025’ a ni a, Serchhip bakah Mizoram hmun hrang hrangah he ni pual hian hun hman a ni.
World Photography Day vawi 186-na pual hian Serchhip-ah chuan I&PR Conference Hall-ah Serchhip Photographers' Association (SPA) leh I&PR Department te tangkawp huaihawta hun hman niin he hun hi SPA President Zoramthanga chuan a kaihruai a, he hun hi I&PR Deputy Director leh Serchhip DIPRO Lalnunmawii chuan hmanpuiin thlalak pawimawhna leh tangkaina te sawiin, Thlalak chu Art anih thu leh Thlalak (Photos) leh a latu (Photagraphers) te hlutna te a sawi bakah Photographer te hmasawnna tur atan thu pawimawhgte a sawi bawk. He hunah hian World Photography Day puala SPA ten thlalak intihsiakna an buatsaih hrang hranga tithate hnenah lawmman sem nghal a ni.

Mizo Photographers’ Society (MPS) chuan World Photography Day pual hian Aizawl-a Millenium Centre (Atrium)-ah ni hnih awh tur thlalak tha phochhuahna, Photo Exhibition an buatsaih a, he Exhibiation hi Information & Public Relations Director C. Lalnunkima chuan hawngin MPS ten Mizoram hmun mawi tak tak an phochhuah thin te chuan mipui rilruah nasa takin hna a thawk niin a sawi a, he Exhibition-ah hian MPS member mi 39 te kutchhuak thlalak 108 phochhuah niin he pawl hi kum 2012 khan din a ni.

Mizoram School of Photography leh Photography Club of Mizoram te tangkawp chuan World Photography Day pual hian Photo Art Exhibition & Competition vawi 9-na chu Archives Hall, Babutlang-ah hmangin MLA, Baryl Vanneihsangi chuan a hawng a, thlalak hmangin hun pawimawh leh nî chhinchhiahtlak te lak niin, Mizo culture leh history te vawnthat saktu a nih thu a sawi bawk. Mizoram School of Photography hi kum 2017 khan din niin he Photo Exhibition & Competition hi a duh apiang tana tel theih niin Thupui thlan bik a awmlo a,mi 49 telin thlalak 108 a lut a ni.

Information & Public Relations Department leh Mizoram Art Development Society (MADS) te tangkawp buatsaih thian ho mi paruk intelkhawm - Art of Infinity-te Group Art Exhibition pawh nimin khan neih tan niin C. Lalremruati MIS, Protocol Officer, GAD chuan Art Gallery, Lianchhiari Rûn, Aizawl-ah a hawng a, he Exhibition-ah hian lemziak hrang hrang 75, Wood Carving pakhat leh Mini Painting engemawzat phochhuah a ni bawk.