Ruihhlo dona kawnga hmalak zel dan tur sawiho

Nimin khan Serchhip-ah District Level Committee on Nasha Mukt Bharat Abhiyan chu an Chairman leh Bawrhsap, Paul L. Khuma hova thukhawmin ruihhlo dona kawnga hmalakna tur hrang hrang an sawiho.
He thutkhawm Serchhip DC Meeting Hall-a neih ah hian Nasha Mukt Bharat Abhiyan hnuaia hmalakna hrang hrang sawiho niin hmalak leh zel dan tur an rel a. Ngawrh lehzuala ruihhlo do a nih theih nana hmalak dan tur ngaih-tuah ho niin, rawtna hrang hrang an sawiho a. Tlawmngai pawl te hmalakna piahlamah Police, Excise, Legal Services Authority te thawh-hona tha a pawimawh thu an sawi a. India Danpui behchhana hma la zel tur leh a la ti ve ngai lo ten an tih ve lohna tura inzirtirna pawh a tam thei ang ber neih nise an ti a ni.

He thutkhawm hian Kohhran hruaitute, Sub-Hqrs. YMA hruaitute, Police leh Education Department te, Joint Village Council te, Sport Association hruaitute leh sawm bik te an tel a. Ruihhlo dona kawnga rawtna thar an thawh-khawm te DC Office-ah kumin September ni 5 ralhmaa thehluh nise an ti a. Heng an rawtna thawhkhawm behchhan hian hmalak zui dan tur (Action Plan) duan a ni anga, chu chu a taka kalpui tum a ni dawn a ni.