Scho la sem loh chhan sawi

Sawrkar laipui-a Ministry of Tribal Affairs in Mizoram sawrkar hnena zirlaite Scholarship sem tur a pek chu sum inhlanchhawnna lama harsatna a awm avangin sem theih ala ni lo.

Mizoram Scholarship Board hotute sawi danin kumin July 7 khan sawrkar laipui-a Ministry of Tribal Affairs hian Zirlaite Scholarship tur Rs. 50,42,81,000 chu Mizoram sawrkar-ah a pe a, sum hi Single Nodal Agency System-a pek niin Mizoram chu Sytem thar, SNA SPARSH, SNA System for Pension Administration (RAKSHA)-ah a inhlan-kai tawh avangin Mizoram Finance Account-ah sum hi an thun thei mai lo a, sum hi an dawn theih nan Mizoram Scholarship chuan SNA SPARSH atana thil tul hrang hrang buaipuiin RBI-ah Account an hawng a, hemi hmang hian August 7, 2025 khan sum hi a rawn lut a ni.

Hetihlai hian Scholarship pekchhuahna, National Scholarship Portal (NSP) atangin sum hi pekchhuah mai theih a ni lo a, Mizoram Integrated Financial Management and Information System (IFMIS) leh NSP hi thlunzawm ngaiin hei hi tih mai theih a ni lo a, niminpiah thleng khan a tih theih dan tur ngaihtuah niin Scholarship an la sem theih loh chhan ber chu NSP leh IFMIS an thlun-zawm theih loh vang a ni a, hei hi thlunzawm a nih loh chuan Scholarship hi sem theih a ni lo a ni.

MSB hotute chuan Scholarship atana sem tur Rs. 50,42,81,000 an dawn chuan kum 2023-2024 a zirlai Scholasrship la pek kim loh mi 4027 te dawn tur Rs. 807,41,000/- bakah kum 2024-2025 a Scholarship sem tur Rs. 42.35,40,000 a daih dawn tih sawiin, hei hi kum 2024-2025 a Scholarship sem tur zatve chuang a ni dawn tih an sawi a. NSP leh IFMIS thlunzawm a nih chuan sem mai theih an beisei thu leh July 7-a sum an dawn khan Finance Department-ah sum hman phalna, Expenditure Sanction an dil fel nghal avangin dil nawn ngai tawh lova sem theih an inbeisei tih an sawi bawk.