Tunhnaia Police Constable lakna chu belhchian dawl ber leh fair bera sawi ngam a ni tih CM in a sawi

Chief Minister Lalduhoma chuan Mizoram Police Constable recruitment neih tawh zawng zawnga belhchian dawl ber leh fair ber tia sawi ngam, Constable Recruitment tunhnaia neih ah Police 259 lak thar an ni tih sawiin, Lok Ayukta thuamthain Inquiry Wing hawn belh a nih thu a sawi.

Mizoram Police Service Association (MPSA) Conference vawi 15-na nimin-a G.S. Arya Mess, PHQ-a neih a hmanpuina ah Chief Minister Lalduhoma chuan Sawrkar hnathawk lak kawngah dan ang taka kalpui leh a tling ngei te chauh lak chu an thupui a nih thu sawiin, “Mizoram Police Constable Recruitment neih tawh zawng zawnga belhchian dawl ber leh fair ber tia sawi ngam - Constable Recruitment tunhnaiah kan nei a, Police 259 lak thar an ni,” a ti a. “Mipui sawrkar kan nih angin tumah thlei bik neih kan phal lo. Constable kan lakna kawnga thawktu in ni a, in chungah lawmthu ka sawi,” a ti. Chief Minister chuan an sawrkar phat atangin eiruk dona lam an bei nghal chat tih pawh sawiin, “Lok Ayukta kan thuam tha a, Inquiry Wing hawn belhin MPS Officer deputation post 3 (pathum) – Chief Inquiry Officer, Inquiry Officer leh Dy. Superintendent of Police te kan siam a. MPS Officer pathum zet in awm belh chuan hma kan sawn ngei turah kan ngai,” a ti a. Tunhnaia Assam State nena ramri-a thil thleng chu a hriat veleh Assam Chief Minister nena an inbiak nghal thu sawiin, “Tuman harsatna siam zawnga engmah tih rih lo (status quo) tura kan lo sawidun tawh chu tha taka kenkawh kan remti dun a ni,” a ti bawk.

Chief Minister chuan MPSA te chu ruihhlo dona ah te, State ralmuang bera chhal theiha Mizoram a awm theihna tura an hnathawh tinrengah lawmthu hrilhin, “Ruihhlo hi Sex dawta HIV thehdarhna hmanraw langsar ber a ni a. Ruihhlo do beihpui kan thlak hian HIV darh zel tur kan veng nghal a, taksa leh thlarau chhandamna hna kan thawk a ni,” tiin kan Police zingah service laia thi kan ngah thin chu a vei thu a sawi a. “An thih chhan tam ber lah hi nun inthlahdahna kaihhawih natna a ni deuh zel a. MPS Officer zingah chuan in awm lo turah ka ngai a, in naute enkawl kawngah fimkhur rawh u,” a ti a. “Officer ten in service leh in hamthatna ringawt in ngaihtuah a, in hnuaia thawkte hamthatna in ngaihthah leh si hian dik kan ti lo. Kan staff ten beisei (claim) an rawn neihin a lo dang bettu ni lovin a lo tanpuitu kan ni thin tur a ni,” a ti bawk.

MPSA Conference-ah hian khual zahawm Home Minister K. Sapdanga pawhin Mizoram Police ten Law & Order an kenkawh that thu leh an lawm thu sawiin, “Tunhnaia Constable lakna, langtlang, fair leh thianghlim tak khan kalphung thara kal sawrkar kan neih takzia a tilang a ni,” a ti a. “Kan khawlaite a lo him loh tak em avangin September thlatir atang hian kawtthler leh khawtlang ralmuang zawk nei turin beihpui kan thlak dawn a. Ramri kan-a chetvelna zirchianna pawh kan nei dawn,” tiin Mizoram Police-in hma a sawn zel theih nana ruahmanna leh rawtnate a tarlang bawk.

He hunah hian MPSA President Zosang-liana pawhin sawrkarin nikum-ah Police Quarters sakna tur cheng vbc. 50 a pek thu leh MPS lak sakin kuminah pawh MPS hi 8 lak mek a nih thu a sawi a. “Kan TA/DA leh kan hamthatna dang tam tak min pechhuak a, Rifle Allowance min tihpun sak a. Constable 259 min lak thar sak a, tunah Sub-Inspector 25 leh IV Grade 6 lak min phalsak leh a, sawrkar chungah hian kan lawm em em a ni,” a ti.

MPSA Conference-ah hian General Secretary Lalmalsawma Hnamte chuan Report pein member 139 an awm mek thu a sawi a, IGP (Crime) Seju P. Kuruvilla IPS pawhin thu sawiin, chawhnu lamah rorel Inkhawm an neih bakah an Member thar te lawmluhna hun an hmang bawk a ni.