Sawhthing ching ve lo te'n hlawkna tel an tum in harsatna a siam tih House-ah sawi

Chief Minister Lalduhoma’n Sawhthing leina man la pekchhuah loh chu pawisa an neih loh vanga pe lo an ni lo tih sawiin, “Fel lo chinfel ngai chinfel apiang te hnenah pekchhuah zel a ni,” a ti a. Agricultre Minister PC. Vanlalruata pawhin Sawhthing ching ve lo te'n Sawhthing-ah hlawkna tel an tum chuan harsatna a siam thu a sawi bawk.

Nimin-a Mizoram Assembly Inkhawm zawhna leh chhanna hunah INC Member C. Ngunlianchunga zawhna chhangin Agriculture Minister PC. Vanlalruata chuan kumin ah sawrkarin Sawhthing a lei zat chu Agust 16, 2025 thlenga report an khaikhawm atangin quintal 3,45,932 a nih thu sawiin, “Sawhthing leina atan hian cheng nuai 95.63 pekchhuah a ni tawh a, la pek loh cheng vbc. 45 vel a la awm. Sawhthing leikhawm hi hralhchhuah leh nghal zel a ni a, Auction Notice tihchhuah niin, a chhang sang apiang hnenah hralhchhuah leh nghal zel an ni,” a ti a. Sawhthing lei nana sum sen hmuhkir leh vek a nih loh thu sawiin, “Sawrkarin Sawhthing lei nana sum a sen atang hian cheng vbc. 12.78 hmuh let a ni. Sawhthing leina tur hi Handholding hnuaiah cheng vbc. 110 dah a ni. Secondary Collection Centre-in portal-ah te an upload a, tihfel ngaite an tihfel hnuah Sawhthing man hi kan pe chhuak zel,” tiin a felfai apiang chu pekchhuah zel a nih tur thu a sawi bawk.

Agriculture Minister chuan Sawhthing man pek tlak mai theih lohna chhan a awm thu sawiin, “Sawhthing vawi khat sawrkarin kan buaipuina a ni a, SCC enkawltute mifel ber ber an lo ni bik lo nen, Sawhthing ching ve lo ten hlawkna tel ve an tum vangin harsatna kan tawk. Myanmar atangin Sawhthing an lalut a, SCC-ah an lo hralh. Portal-ah an upload tawh si. Social Audit neih a ni a, a ching ve reng reng lo te an tel si. A bikin khawchhak lam ramri-ah,” a ti a. Heng te hi a hmunah kal-a enfiah a nih thu leh Social Audit te an neih thu pawh Minister chuan a sawi a ni.

Sawhthing atan Market Intervention Scheme (MIS) an dil ve thu pawh Agriculture Minister PC. Vanlalruata chuan sawiin, “Ministry lama Joint Secretary-te ko chhoin, kan Sawhthing leikhawmte kan enpui a, MIS hi dil ve turin min ti a ni. MIS kan hmuh chuan direct-a benificiary-te account-ah luh vek a ngai, District Level-ah pawh an account-ah a luh vek a ngai. Account-te kan thlak a, hei pawh hian sum pekchhuah a ti muang," a ti a, MIS atang hian cheng engemaw zat an dawn dawn thu a sawi bawk.

He hunah hian House Leader Lalduhoma pawhin Sawhthing lei chungchang hi House-ah sawiin, Sawhthing man an pek tur hi cheng vbc. 95.63 vel a chhut mek a nih thu a sawi a, Budget-a cheng vbc. 110 dah in a daih lohna zawng chu Handholding atangin an pek dawn thu leh a inpeih apiang an pe zel ang tih a sawi a. ZPM sawrkar Flagship Programme, Bana Kaih- Handholding Scheme hnuaiah Sawhthing leina tur hi dah tel a nih thu pawh sawiin, Sawhthing-ah chauh dah lovin, Hmarcha, Buhhum, Aieng, Hmunphiah, Rubber, Entreprenur te, Innovator te tan te, Special Package pawh dah vek a nih thu leh a tul apiangah an hmang zel dawn tih a sawi a ni.

Nimin-a Session-ah hian Agriculture Minister in Sawhthing lei dan a tarlan danin, kumin February 20 leh June 30 chhung khan Sawhthing hi lei niin August 16 thlengin quintal 3,45,932 an lei tawh tih report a nih thu a sawi a, Sawhthing hi Phase 1-na ah April 20 thlenga leiin kg. ah Rs. 50/- zelin lei a ni a. Phase 2-na chu April 21 atanga June 30 thlenga kalpui ni thungin Company hnenah auction in an hralh a, a leitu company te hian lei zuiin an leina man Rs. 50 a tlin lohna zawng Support Price chu sawrkarin a pe a ni.

Hemi ang hian Sawhthing leina atan hian cheng nuai 95.63 pekchhuah ni tawhin la pekchhuah loh vbc. 45 vel a awm mek a, heng te hi pek zel a nih thu pawh Minister hian a sawi bawk a ni.