Mi sing khat chuang te training pek tum an ni

Sports & Youth Services Minister Lalnghinglova Hmar chuan Bana Kaih (Handholding) Scheme hnuaia Empowering Mizoram Sports (EMS) hnuaiah a bultan nan mi 10,000 chuang training pek theih tura ruahman a nih thu a sawi.

Nimin-a Assembly Inkhawm zawhna leh chhanna hunah ZPM Member Lt. Col. Clement Lalhmingthanga zawhna chhangin Sports Minister Lalnghinglova Hmar chuan Bana Kaih hnuaiah EMS hlawhtling taka kalpui a nih theih nan hmalak mek a nih thu sawiin, “EMS hnuaia discipline kalpui theih tur thlan fel tawh niin, EMS web application duan mek a ni a. EMS hi a taka kalpui dan tur duan a ni tawh,” a ti a. EMS chu Fur ruahtui hul hnu, Thal lo awm turah kalpui a nih dawn thu sawiin, Olympics 2036 thlir chungin Mizoram sawrkar chuan Sports Association-te leh Mizo infiammite chhawmdawlna a pek reng thu House a hrilh bawk.

Zawh belhna chhangin Sports Minister chuan New Champhai Ground atan sanction cheng nuai 12.1 hmuh a nih thu sawiin, “DPR buaipui mek a ni a, peihfel a nih velah Tender chhuah a, hna kalpui kan tum. Thenzawl atan pawh sanction kan nei,” a ti a. Tuichangral Games leh Tuipural Games chu ZPM a sawrkar chhung chu sawrkarin a tul angin a pui zel dawn tih a sawi bawk.