Mizoram-ah Mit pe tura intiam 9231 awm tawh

Mizoram-ah Thih hnua midang tana Mit (eye) pe tura intiam mi 9231 an awm tawh a, Corneal Transplant tawh ti tawh mi 593 awmin kumin April atangin Mizoram-ah Mit pe (Eye Donate) 32 an awm tawh bawk.

National Eye Donation Forthnight vawi 40-na pualin nimin khan Health Worker Training School, Kulikawn-ah hun hman a ni a, he hun hi National Health Mission (NHM)-a Mission Director Dr. Lily Chhakchhuak chuan hmanpuiin July ni 12, 2008-ah CHA, Eye Bank chu Eye Bank Association of India-ah register niin Mizoram-ah July ni 31, 2008-ah Civil Hospital, Aizawl-ah Eye Bank hawn a nih thu a sawi a. September ni 25, 2009-ah Eye Donation hmangin Civil Hospital-a Mit Doctor leh Sri Sankaradeva Nethralaya, Guwahati bakah Eye Care Hospital te nena tangkawpin a hmasa ber atan Corneal Transplant (Mit thlak) tih a nih thu a sawi a. Mizoram Eye Bank hi Eye Bank Association of India member niin Transplantation of Human Organ Act, 2011 hnuaiah regiater thlap a nih thu a sawi a ni.

Tun thlengin Mizoram-ah thih hnua Mit pe (Eye Donate) tura intiam mi 9231 awmin Mit thlak ngai in register mi 391 an awm tawh thu pawh sawiin, Mit thlak sak tawh zawng zawng hi mi 593 an awm tawh thu Dr. Lily Chhakchhuak chuan a sawi a. Hengte hi Civil Hospital, Aizawl, Sri Sankaradeva Nethralaya, Guwahati, Eye Care Hospital, Aizawl leh Synod Hospital-ah te tih a nih thu a sawi a. Mit lak tawh zawng zawng tun dinhmunah 1328 awmin, Mit pe tawh hi tun dinhmunah mi 672 an awm tawh bawk a ni.

He huna kalkhawm te leh Mizo mipuite chu midangten khua an hmuh theihna tura thih hma emaw, thih hnu emaw a Mit pek uar sauh sauh tura chahin, mi tupawhin Mit a pek theih a, mi a thih atanga darkar 6 chhunga lak tur a nih thu leh Mit pe tura in register tawh ten chhungte hnena hrilhhriat a tul thu a sawi a. Mit pe duh emaw, pek ngai in register duh te tan 24X7-a Toll Free No. 9436354701 emaw, 0389-2324564-ah emaw biak theih reng an nih thu sawiin, India ram state zawng zawng Eye Donation lam endikna-ah a ti tha zual 15 zingah Mizoram chu kan tel ve thu sawiin thawktu zawng zawng te thawhrimna-ah lawmthu a sawi bawk.

Eye Bank hotute chuan Mit pe turin kum bithliah awm lovin Mit lama harsatna nei tan pawh Mit darthlalang a chhiat loh chuan pek theih a nih thu te, midangte tana thih hnua mit pe duh tan inziahluh theih a nih thu leh hriatpuitu erawh an awm a ngaih thu te an sawi a. “Thi hnua Mit pek hian Mit mu zawng zawng lachhuak lovin Mit darthlalang chauh lakchhuah a nih avangin mihring hmel a ti danglam lo a, mitthi chhungte tan pawh hmuh nuam lo engmah a awm lo,” an ti bawk.