Red Ribbon School Quiz nei

HIV/AIDS dona kawnga hmalakna pakhat atan nimin khan Serchhip Pisapui Hall-ah Serchhip District Level Red Ribbon School Quiz Competition neih a ni a, Presbyterian English School (High School Section) Serchhip chu pakhatna an ni.
Serchhip District Level Red Ribbon School Quiz Competition hi Serchhip Bawrhsap Paul L. Khuma chuan khuallian nia hmanpuiin he huna kalkhawm zirlaite chu duhthlanna dik siam turin a chah a. An nunah harsatna a thleng a nih pawhin, duhthlanna dik thlang a, ruihhlo leh sual danga tlu lo turin a fuih a. HIV/AIDS leh mipat hmeichhiatna atanga inkaichhawn theih natna tha lo te an vei lohna tura inveng fimkhur tur leh mi dangte zirtirtu ni turin a sawm bawk a ni.

Red Ribbon Quiz-ah hian Serchhip atangin Marian H/S, Presbyterian English School (H/S Section), Presbyterian English School (M/S), Chawngbuangi Memorial School leh Brilliant Higher Secondary School te an tel a. Serchhip khaw pawn atangin St Monfort School, Khumtung; Presbyterian English School, Baktawng leh Vantawng H/S, Thenzawl te an tel a. He Quiz hi Class 8, 9 leh 11 zirlai te tana buatsaih niin Serchhip District chhunga School hrang hrangah August ni 15 khan Online Quiz hi buatsaih a lo ni tawh a. A titha zual School 8 te nimin khan an inel a ni.

Red Ribbon Quiz Competition hi naupang leh tleirawl te zingah nasa lehzuala HIV/AIDS chungchanga inzirtirna atana District AIDS Prevention Committee, Mizoram State AIDS Control Society leh School Education ten an buatsaih niin HIV/AIDS leh mipat hmeichhiatna atanga natna inkaichhawn theih te a darh zel lohna tura hmalakna a ni a. Presbyterian English School (H/S Section) Serchhip chu pakhatna niin lawmman ah Rs. 7000/- an dawng a, Marian H/S chu pahnihna niin Rs. 5000/- dawngin pathumna Chawngbuangi Memorial School Serchhip chuan Rs. 4000/- an dawng bawk a, an vai hian Thuziak leh Memento hlan theuh an ni bawk.