Committee on Public Undertakings in Report thehlut

Mizoram Legislative Assembly-a Committee on Public Undertakings chuan nimin khan PSU pali- MAMCO, MIFCO, ZIIDCO leh ZO-HANDCO te chungchang an zirchianna leh rawtna an neih te Assembly House-ah an pharh.

Nimin a Report an thehluh-a tarlan a nih danin Mizoram Agricultural Marketing Corporation Limited (MAMCO) hian a dinchhan ber Agricultural activities a kalpui tawh lovin Construction works chauh a khawih tawh a, thawktu tam zawkte hi Engineer an ni a. ZIIDCO hian Construction works a khawih bawk a. Chuvangin, heng Corporation 2-te hi ‘merge’ nise tiin recommendation a siam a. MAMCO leh ZIIDCO merge a nih hnuah Nodal Department, Commerce and Industries Department atanga Finance Department-a dah te, Finance & Accounts Officer post, MF&AS in deputation-a a chelh tur siam nise tih te, Works Department khawi emaw ber atanga Chief Engineer-in Corporation thar h, a normal duties piah lama enkawl tel turte in an rawt bawk a ni.

Heng bakah hian PSU pali te tan hian abik takin Chairman leh Managing Director-te chu Political Ground-a appoint ni tawh lo se, Chief Minister, Speaker of Legislative Assembly, Leader of Opposition/Group Leader te telna Search-cum-Selection Committee din nise, Corporate lama sulhnu nei tha tak ngei appoint ni tawh se an ti a. Mizoram Food & Allied Industries Development Corporation Limited (MIFCO) chungchang ah AMC area huamchhunga Vawk talhte chu vawk talhna hmun bikah chauh talh nise, hemi atan hian ‘Pork and Poultry Processing Plant’ Bung Bangla, Zemabawk-ah talh nise, tihchangtlun lehzual nan sum allocate ni se, Local Fruit Beverages siamchhuah, hralh leh supply a nih theih nan concerned authority-ah license dil nise tih te a tel bawk a ni.