Mizoram-a Doctor ten Lung natna chungchang an zir

Mizoram-a sawrkar damdawi In hrang hranga thawk Doctor te tan Lung natna, Cardiovascular Diseases chungchang zirhona ni hnih awh tur chu nimin khan Civil Hospital, Aizawl-ah neih tan a ni.

Mizoram Health Systems Strengthening Project (MHSSP) hmalakna a he zirhona ah hian Mizoram-a Sawrkar Damdawi In - PHC, CHC, UPHC leh District Hospital-a Doctor te telin he hun hmanpuitu MHSSP-a project Director leh NHM-a Mission Director Dr. Lily Chhakchhuak chuan Lung natna chu Mizoram-a harsatna kan tawh nasat leh hnuk hnaih em em thil anih avangin training neih a pawimawh thu sawiin, khawvel puma thihna tam ber te zinga mi a nih thu a sawi a. Lung natna tam zawk chu nundan hrisel leh ei leh in hrisel kan ei a, ruihhlo laka kan insum chuan a inven ve theih thu leh Lung natna te chu hmuhchhuah hma a pawimawh thu a sawi a. NHFS-5 Key indicator Mizoram (2019-21)-ah Mizoram-ah mahni rihna tur aia rit mipa 31.9% leh hmeichhia 24.2% awmin, Thisen sang nei mipa 33.6% leh hmeichhia ah 23.4 % bakah Zunthlum nei mipa 17.3% leh hmeichhia 15.2 % an awm tih a sawi a. Hei hian a entir chu Mizoram hi ram pum huap pawh a rit lutuk te, Thisen sang leh Zunthlum nei kan tam tih a nih thu a sawi bawk.

He hunah hian Civil Hospital Aizawl Cardiology Department a mithiam ten kalkhawmte zirtirna pein Dr. Loncy V. Lalzarliana chuan Lung pawimawh zia sawiin, Leviticus bung 17:11-a inziak angin ‘Thil nung reng reng, an nunna chu an thisen-ah a awm a’ tih anih ang khan taksa peng dangte ang lo takin Lung hi a thatloh tawh chuan nunna atan a derthawng thei a, Thin te, Chuap te, Thluak te thleng pawhin a chanve chauh hmangin kan nun theih laiin Lung erawh a theih ve loh tih a sawi a. Lung natna chi hrang hrang te tarlangin, a enkawl dan tur te, natna a zir-a damdawi hman tur chi hrang hrang te a hrilhfiah bawk.

Dr. Mary C. Lalnuntluangi hian Lung natna lo awm chhan hrang hrang te sawiin, kan tih danglam theihloh entirnan, kum upatna te, inthlah-chhawn te, chhung hnai te a Lung natna nei an awm te bakah mipa te ah a tam bik a. A chhan tam zawk erawh kan tih danglam theih niin Thisen sang, Zunthlum, Meizuk, Thau lutuk, ei leh in hrisello, Zu in nasa, mu thalo leh rilru hah nasa ah te hian a awm duh tih a sawi a. Lung natna tam zawk te hi chu nunphung hrisel zawk, taksa sawizawi tam, ei leh in hrisel te hmangin kan ti tlem thei tih a sawi bawk.

He hunah hian Dr. Isak Lallawmkima pawhin Lung natna lo lanchhuah dan te sawiin, natna lanchhuah dan atangin eng ang natna ber nge tih hriat hran dan te a hrilhfiah a, Lung lam harsatna nei damlo a lo kala lo hriat hran vat dan te leh endikna hrang hrang tih tur te zirtirin ECG a Lung natna hrang hrang awmdan te pawh a sawifiah bawk.