Serchhip-ah BSF la dawn

Serchhip hmun-a Border Security Force (BSF) Sipai lakna neih tur chungchang chu nimin khan Bawrhsap hovin Serchhip DC Meeting Hall-ah Bawrhsap, Paul L. Khuma hovin sawiho a ni. BSF Constable (GD) 300 lakna hi Mizoram-a Centre pathum- Serchhip, Aizawl leh Lunglei-ah neiin mi 100 theuh lak tura ruahman a ni a, Ser-chhip-ah chuan Sports Complex-ah neih tur niin Serchhip District, Khawzawl District leh Champhai District te a huam dawn a, kum 18-28 inkar tan dil theih niin September 2 atanga September ni 18, 2025 chhungin sawrkar chawlh tiam lohin form fill up sa nen Serchhip Sports Complex-ah hian kal tur a ni a, an form te endik sakin Physical Test atan Admit Card pek an ni bawk ang. Dilna form hi Serchhip DC Office-ah lak theih a nih bakah BSF Website link https://rectt.bsf.gov.in/static/bsf/pdf/180825_MC.pdf atanga download theih a ni bawk ang.

* Serchhip Centre in District pathum - Serchhip District, Khawzawl District leh Champhai District te a huam dawn.

* Kum 18-28 inkar ten an dil thei anga, 01.08.2007 hnulama piang te tan dil theih a ni lo ang.

* Zirna ah Pawl 10 pass chin tan dil theih a ni.

* San zawngah mipa 157cms (ft5.15), hmeichhia 147.5cms (ft 4.83) tal an ni tur a ni.

* Dilna form hi Serchhip DC Office ah lak theih a ni a. Social media kaltlangin pdf thehdarh a nih bakah BSF Website link https://rectt.bsf.gov.in/static/bsf/pdf/180825_MC.pdf atanga download theih a ni bawk.

* “NCC ‘C’ Certificate nei te tan 5% mark belh sak an ni anga, B Certificate nei tan 3% leh A Certificate nei tan 2% belh sak an ni ang.

* Recruitment Centre hi Serchhip Sports Complex a ni dawn a. September ni 2 atanga September ni 18 (sawrkar chawlh tiam lohin) chhungin form fill up sa nen Serchhip Sports Complex-ah hian kal tur a ni a, an form te endik sak an ni anga physical test atan admit card pek an ni bawk ang.

* Passport size photo bakah Education Certificate, ST Certificate leh Aadhaar/VoterID/Ration Card xerox copy ken tel tur a ni a. Heng xerox copy te hi mahnia attest (self attest) pawm a ni ang.

* Physical Test hi September 23 atanga October 9 thleng neih tur a ni.

* Written Exam hi October 18 ah neih tur a ni ang. Written Result hi October ni 22 ah puan a ni ang.

* Medical Exam hi October 27 atanga November 4 chhung neih a ni ang. BSF Constable a tling te result hi November ni 10 ah puan a ni ang.