Home Minister in Police lak thar te an Uniform hak in a entir - discipline a taka lanchhuah tir turin a chah

Tunhnaia Mizoram Police Constable atana lak thar te tana Training hawnna chu nimin khan Thenzawl-a Police Training School-ah neih a ni a, he hun hmanpuitu Home Minister K. Sapdanga chuan Police lak thar te chu an Uniform hakin a entir - discipline a taka lanchhuah tir turin a chah bawk.

Thenzawl Police Training School-a Police Training hawnna hunah hian Home Minister K. Sapdanga chuan tun tuma Police Constable lak thar te chu khirh leh fimkhur taka lak an nih thu leh thlan satliah an ni lo tih a sawi a, “Vawiin ah hian Mizoram Police-in bung thar kan kai a ni,” a ti a. Training chhungin an rilru leh theihna zawng zawng hlan turin a fuih a, mipuite thlamuanpui tham Police zahawm nih tum tura chahin, Police Uniform hlutzia leh zahawmzia hre turin a fuih a, Home Minister chuan an uniform hakin a entir - discipline a taka lanchhuah tir turin a fuih bawk.

Home Minister chuan Excise, YMA leh Police te tanghoin Drugs leh ngawlvei do beihpui thlak an tum thu pawh he hunah hian sawiin, “Drugs tawlhru te mai bakah ngawlvei te hian rukruk leh pawi dang an khawih thin avangin nun an ti ralti a, kan do a ngai a ni,” a ti a. Home Minister a nih atangin kuhva tawlhruk nasa leh zuala an do thu te, checkgate-a a pawnga puia pawisa khawn tihtawp a nih thu te leh Police inenkawlna kawngah hmasawnna hmel an hmuh hrang hrangte he hunah hian a sawi bawk.

He hunah hian Supply Minister B. Lalchhanzova pawhin Police Constable tharte fuihna thu sawiin, ‘Eng vanga helai hmuna lo kal nge, eng ti tura PTS Thenzawl-a awm nge an nih?’ tih chu an thinlung luah rengtu leh an awm chhunga an nun kaihruaitu ni se a duh thu a sawi a. Thuawihna nun nei tur leh tuarchhel tura fuihin, “Khawvel hi mi pangchangte hrehawmna, mi tuarchhel te nuam tihna hmun a ni,” a ti a. Mi dangte puih beisei loa mi dangte tanpuitu nih tum zawk tura chahin, “Police te chu kan hnam rohlu an ni a, mipuiten kan thlamuanpui che u a ni,” a ti a. “Kan ram tan Vawiin-ah in training a ni tih hriain theihtawp chhuah ang che u,” tiin a fuih bawk.

Police Constable lak thar te Training bul tanna hun ah hian Mizoram Director General of Police (DGP) Sharad Agarwal chuan tun tum hi Mizoram-ah kum 10 chhunga a ruala Police lak hnem ber tum a nih thu a sawi a, Constable Basic Training a tel te fuihin kum 30 atanga 35 chhung vel chu Police chhungkuaa telin, Police hi an nihna a ni tawh dawn a, chuvangin thahnem ngai taka training a, Mizoram Police te thil tum a taka nun chhuahpui turin a fuih a ni.

Heng Constable lak thar te hi Aizawl District atangin mi 138, Lunglei District atangin 24, Serchhip District atangin 21, Champhai District atangin 23, Mamit District atangin 12, Kolasib District atangin 19, Hnahthial District atangin 6, Saitual District atangin 12, Siaha District atangin 4, Khawzawl District atangin 5 leh Lawngtlai District atangin mi 3 an ni a. An zingah hian Hmeichhia 26 an tel a ni.

Tun tum Constable Basic Training hi Batch 70-na niin an vaiin Constable 277 an ni a. Training tan hun (start date) hi kumin September ni 1 atangin a ni a, Training tan hma kar khat hi ‘Zero Week’ ti a vuahin Constable thar te luh hun leh an tlangnelna hun atan hman a ni dawn a. Indoor leh Outdoor training chu chawlhkar 45 chhung ngawrh takin an kalpui anga, July 2026-ah Training zo thei tura beisei an ni. He training Course hi uluk taka duan niin, mahni invawng thei mi, mi tha, khawtlang leh ram tana mi hlu chher-chhuah chu an tum ber a ni.

Training bul tanna hun hi PTS-a Vice Principal Zomuanpuii’n kaihruaiin Principal Lalthakima chuan inlawmna thu a sawi a, Addl. SP (Training Branch) C. Lalbiaksiami chuan lawmthu sawiin hun hnung a khar a ni.