Kum 2024-ah MCCD-a thi chhinchhiah 4329 awmin thi zingah mipa a let deuhthaw in an tam

Mizoram-ah kum kalta 2024 chhung khan Doctor ten mitthi te an thihna chhan an chhinchhiah mi 4329 awmin thihna thlentu zingah kawchhung lam tha lo chu a tam ber an ni a. Kawchhung lam tha lo zingah hian Thin (liver) tha lo vanga thi chu an tam fal hle bawk a ni.

Mizoram sawrkar-a Economics & Statistics Department-in kum tin-a sawrkar Damdawi In, mimal enkawl damdawi In, UPHC, CHC, PHC leh Mizoram hmun hrang hranga Registrar of Births and Deaths 116 te hnen atanga damlote thih dan, 'Medical Certification of Cause of Death 2024' a tihchhuah atanga a lan danin nikum (2024) chhung khan heng damdawi In leh RBD te chhinchhiah hmunah te hian mitthi 4329 an awm a. Thudawn danin MCCD-a thi chhinchhiah hi Mizorama thi zawng zawng zatve vel niin mitthi te hi ipa 2843 leh hmeichhia 1486 te an ni a, hmeichhia aia mipa thi an tam zawkna chu 1357 niin MCCD atanga chhutin hmeichhia aia mipa thi tam zawkna hi 65.67% a ni.

Medical Certification of Cause of Death 2024 tarlan danin nikum chhunga Mizoram-a thihna thlentu langsar zualte chu kawchhung lam tha lo, thawk lama harsatna, thisen zam tha lo, natna hrik vanga thihna leh Cancer kaihhnawihte an ni a. Thihna thleng zingah kawchhung (digestive system) tha lo a thi tam berin he natna vang hian mi 803 an thi a, hei hi thihna thleng zawng zawng atanga chhutin 18.5% a tling phak a. Pahnihna chu Thawk lama harsatna (respiratory system) niin mi 666 thiin hei hi a vai atanga chhutin za zela 15.3 a tling phak a, pathumna chu thisen zam tha lo (circulatory system) niin mi 636 (14.7%) an thi a, palina chu natna hrik (infectious and parasitic disease) vang niin mi 483 (11.1%) leh Cancer kaihhnawih (neoplasms) vanga mi 469 (10.8%) thihna chu a langsar zualte an ni.

Medical Certification of Cause of Death 2024 tarlan danin pum lam tha lo vanga thi 803 zinga 607 hi mipa niin a dang 197 hi hmeichhia an ni a. Pum lam tha lo zingah hian Thin (liver) tha lo vanga thi an tam lawr lak a, Digestive System tha lo vanga thi 18.5% zinga 15% hi Thin leh a kaihhnawih tha lo an ni a. Thin tha lo zingah Zu in, Hepatitis, Toxic leh Thin ro (cirrhosis) te chu a langsar an ni.

Thihna thlentu pahnihna thawk lama harsatna (respiratory system) vanga thi zinga428 hi mipa niin hmeichhia 238 an awm a, pathumna thisen zam tha lo (circulatory system) vanga thi zingah pawh mipa tam zawkin 414 an awm a, hmeichhia 222 an awm bawk.

Nikum-a MCCD a thi chhinchhiah atanga a lan danin District hrang hrang zingah Aizawl District-ah mitthi an tam ber a, mi 2609 an thi nia chhinchhiah a ni a. District hrang hranga MCCD thi chhinchhiah hi Mamit District-ah 202, Kolasib District-ah 336, Champhai District-ah 1962, Serchhip District-ah 81, Lunglei District-ah 418, Lawngtlai District-ah 209, Siaha District-ah 217, Khawzawl District-ah 47, Hnahthial District-ah 60 leh Saitual District-ah 87 te an ni.

Zawhna chhangin Economics & Statistics Department thawktute chuan data an lakkhawm hi World Health Organisation (WHO) in ruahmanna a siam anga mithiam ten an thihchhan an ziah niin an sawi a. Mizoram-a mitthi zawng zawng an thihchhan an chhinchhiah vek thei lo tih sawiin, damdawi In-a inenkawl leh thi te chauh MCCD-ah hian an thihchhan tarlan a ni tih an sawi bawk.