Kumin ah Scrub Typhus kai 12,470 hmuh an ni tawh

Mizo ten ‘Rannung seh’ kan tih mai ‘Scrub Typhus’ vei kum tinin an pung zel a, kumin ah he hri kai hi mi 12,470 hmuhchhuah an ni tawh a. Hetihlai hian Rannung seh-ah Rul sa a that leh that loh chu finfiahna a la awm loh vangin natna enkawl nan hian a that leh that loh hriat a la ni lo.

Health Department-a thawktute hnen atanga thu a dawn danin Rannung seh natna hi kum 2014 vel atang khan hriat lar tan niin kumtin hri kai hi an pung zel a. Kumin January atanga August ni 18,2025 thleng khan Mizoram-ah Scrub Typhus hri kai mi 12470 hmuh ni tawhin la pung chho zel tura ngaih a ni a. Kumin ah pawh hrikai hi an la pung chho thei nia sawiin Health Department thawktute chuan, “Khaw nawm hunlai November leh December hi ramkal tam hun lai a ni a, heng hunlai hi hri kai tam hun anih avangin kum dang aiin hri kai hi kan pun ngei a rinawm a ni,’ an ti.

Chhinchhiahna atanga a lan danin kum 2014 khan Mizoram-ah Scrub Typhus kai mi 183 hmuh niin kum 2015-ah 150; kum 2016-ah 90 leh kum 2017-ah mi 146 hmuh an ni a. Kum 2018-ah mi 2183 hmuh niin kum 2019-ah 5859; kum 2020-ah 2744; kum 2021-ah 2323; kum 2022-ah 5806 leh kum 2023-ah 12497 hmuh an ni a, kum 2024-ah 16,698 hmu lehin kumin ah 12,470 hmuh an ni tawh a ni.

Scrub Typhus chu Sazu in an thehdarh nasa nia sawi bawkin, “Kum 2007-08 Mautam vanga Sazu puang atang khan Scrub Typhus hi a hluar tan a. Kumin ah pawh Rawthing a tam nasa leh a, khaw tam takah Sazu a puang nasa hle a. Sazu hi hri pudarhtu leh thehdarhtu ber an nih avangin pung nasa turah kan ngai a ni,” an ti a. Sazu sa ei avangin hri chu thehdarh a ni lo tih sawi bawkin, “Sazu man leh khawih atangin hri hi kai theih a ni a. Hei bakah hian kan Ui vulh atangin hri hi thehdarh theih a ni tih College of Veterinary Sciences, Selesih chuan an finfiah tawh a ni,” an ti bawk.

  Typhus chu enkawl ran anih chuan tihdam a awlsam nia sawiin, enkawl tlai anih thin vangin thihpui an awm niin an sawi bawk a. “Khawsik, lu na, taksa na, ruh chuktuah na leh thil ei tui lo kan neih chuan in test ngei ngei a tha a. Doctor kan rawn vat chuan enkawl dam theih mai a ni a, tlai erawh chuan thihna hial a thlen thei a. A hun taka Doctor pan chuan enkawlna an dawng tha a, an thihpui lem lo a ni,” an ti a. Scrub Typhus chu Aizawl, Serchhip, Lawngtlai, Lunglei leh Mamit District-ah a tam zual nia sawiin, hei hi test a tam vang nia an hriat thu an sawi bawk.

Rannung seh natna ah Rul sa a that leh that loh zawhna chhangin Health Department-a thawktute chuan, “Zirchianna a la awm loh avangin a that leh that loh sawi ngam a la ni lo a. Rul sa hian protein engemaw zat a pai a, hei hian a ti harhin damlo pawhin an thatpui ve thei a, chutih rualin Scientific Proof erawh a la awm lo a ni,” an ti bawk.