Health Worker mi 31 te dahngheh chungchang Health Department in an sawifiah

Mizoram sawrkar-a Health & Family Welfare Department chuan tunhnaiah Health Worker mi 31 te dahngheh chungchang chu thuchhuah siamin a sawifiah.

Hemi chungchanga sawrkar thuchhuah tarlan danin Health & Family Welfare Department chuan Centrally Sponsored Scheme (CSS) hrang hrang a kalpui thin thu leh chung CSS zinga kum 2010 atanga a lo kalpui tawh pakhat chu ‘Implementation of Family Welfare Programme’ niin hemi hnuaiah hian component a kalpui pakhat chu - Infrastructure Maintenance (Sub Centre) niin he Scheme hi Central Sawrkar - Ministry of Health & Family Welfare hnuaia Centrally Sponsored Plan Scheme hnuaia mi a ni tih an sawi a. IM Scheme hnuaiah hian kum 2013 khan Sawrkarah Health Worker 50 lak phalna dilin Sawrkar chuan MR Skilled–II Basis a lak phalna pein an Engagement Card-ah chiang takin ‘Co-terminus with the scheme’ ziahlan kher tur a ti nghe nghe niin an sawi a. Hemi ang hian Sawrkar dan ang thlapin Health Worker MR employees 50 lakna tur advertisement chhuahin Written Exam leh DPC hmaah Personal Interview an paltlang vek hnuah Health Worker thawk turin mi 50 te chu Appointment pek an ni a. Thi leh bang an awm avangin tun dinhmunah mi 32 in an hna hi la thawkin, Scheme borne an nih avangin PE Regularization Scheme, 2020 dan hmanga tihngheh theih an ni lo tih an sawi.

Hetihlai hian kum 2024 khan sawrkar chuan CSS hnuaia thawkte dahnghehna tur ‘The Government of Mizoram Regularization of Centrally Sponsored Scheme (CSS) Employees Scheme, 2024’ siamin CSS Regularization Scheme, 2024 in eligibility criteria a sawi leh DP&AR in check list a siamte zawm leh nei famkim vek an nih avangin IM Scheme hnuaia Health Worker-te hi dahngheh (Regularised) an nih theih nan Sawrkar ah thlen a nih thu sawiin, an zinga pakhat chuan CSS regularization check-list documents a neih kim loh avangin regularize ve theih a nih tak loh thu pawh an tarlang a ni.

Hei mai bakah hian fimkhur thu ah ‘Implementation of Health & Family Welfare Programme Scheme’ atana Central sum hmuh hi CSS a chhiar tur a nih leh nih loh Finance Department-ah zawh a nih thu leh Law & Judicial Department-ah pawh thurawn lak a ni leh bawk tih sawiin, chhanna hi an dawn thu an sawi a. “Sawrkar dan leh dun engkim zawh famkim a, dan ang thlapa CSS Regularization Scheme, 2024 hnuaia regularize theih Health Worker 31 lai kan nei hi Department chuan lawmawm a ti hle a. Tuna Health Worker mi 31 te hnena an chanvo dik tak, regularization a pek hian Sawrkar chuan mipuite leh a hnathawkte lakah a tih tur diktak a ti a ni,” an ti bawk.